21.05.2026 | 18:57
Իշխանությո՞ւնն է բեմադրել զինված անձանց տեսանյութը․ Լուսինե Բադալյանը բացառում է․ ՏԵՍԱՆՅՈՒԹ
Գյումրու ծերանոցում համաճարակային իրավիճակը կայունանում է․ կորոնավիրուսով հիվանդ շահառուներից միայն 4-ն է հիվանդանոցում
22.07.2020 | 15:43
Գյումրիի տարեցների տուն-ինտերնատում կորոնավիրուսային իրավիճակը կայունանում է։ Այժմ խնամքի կենտրոնի շահառու 4 պացինենտ է հոսպիտալացված։
«Հիվանդանոցում արդեն 4 հոգի է մնացել, մյուսները դուրս են գրվել։ Երկուսը Սպիտակում են, մեկը՝ Երևանում, մեկը՝ Գյումրիում»,- Factor.am-ի հետ զրույցում ասաց Հայկական Կարմիր Խաչ ընկերության լրատվական ու լուսաբանման բաժնի վարիչ Նունե Գրիգորյանը։ Հիշեցնենք, որ մայիսի 1-ից Հայկական Կարմիր Խաչն է ստանձնել խնամքի կենտրոնի կառավարումը, և այն այժմ կոչվում է Գյումրու շուրջօրյա խնամքի կենտրոն։
Մեր զրուցակիցը նաև նշեց, որ 16 շահառու մեկուսացած է խնամքի կենտրոնում, նրանց վիճակը նորմալ է։ Աշխատակիցների մոտ էլ փոփոխություն չկա առաջին օրվանից։
«12 հոգի էր հիվանդ, որոնցից մեկը՝ հիվանդանոցում, մյուսների վիճակը նորմալ է։ Իրենք տանն են մեկուսացած»,- ասաց Նունե Գրիգոյանը։
Ընդհանուր առմամբ, հիվանդ շահառուներից մահացել է 5-ը։
«Վերջին շահառուի մոտ կրկնակի թեստը բացասական էր, սակայն այնքան ծանր հիվանդություններ ուներ, որ մահացել է»,- ասաց Գրիգորյանը։
Նշենք, որ ի սկզբանե խնամքի կենտրոնի 151 շահառուից կորոնավիրուս հաստատվել է 56-ի, 66 աշխատակցից էլ՝ 12-ի մոտ։ 37 հիվանդ հոսպիտալացվել էր, որոնցից 5-ի վիճակը ծանր էր։
Հավելենք, որ Շիրակի մարզպետարանի հրապարակած վերջին տվյալներով՝ Գյումրու ինֆեկցիոն հիվանդանոցում կորոնավիրուսով Շիրակի մարզի 55 բնակիչ է բուժվում։
Կորոնավիրուսից առողջացել և հիվանդանոցից մինչ օրս դուրս է գրվել Շիրակի մարզի 415 բնակիչ։ 47 հիվանդներ տեղափոխվել են մայրաքաղաք: Մարզում, ընդհանուր առմամբ, արձանագրվել է կորոնավիրուսից մահվան 31 դեպք։
Էմմա Չոբանյան
