10.09.2026 | 14:02
Գագիկ Խաչատրյանին դարձյալ պատգարակով դատարան էին բերել․ ՏԵՍԱՆՅՈՒԹ
«Ելք»-ի՝ ԵՏՄ-ից դուրս գալու նախագիծը բացասական եզրակացություն ստացավ. կողմ քվեարկեցին «Ծառուկյան» և «Ելք» խմբակցության պատգամավորները
Քաղաքականություն
29.11.2017 | 13:14
Ազգային ժողովի արտաքին հարաբերությունների հանձնաժողովը ձայների 2 կողմ, 6 դեմ, հարաբերակցությամբ բացասական եզրակացություն տվեց ընդդիմադիր «Ելք» խմբակցության Եվրասիական տնտեսական միությունից (ԵՏՄ) դուրս գալու գործընթաց սկսելու վերաբերյալ ԱԺ հայտարարության նախագծին:
«Ելք» խմբակցության հեղինակած այս նախագիծը երկու ամիս առաջ ևս ներառվել էր արտաքին հարաբերությունների մշտական հանձնաժողովի նիստերի օրակարգ, սակայն չէր քննարկվել հիմնական զեկուցող, «Լուսավոր Հայաստան» կուսակցության ղեկավար Էդմոն Մարուքյանի բացակայության պատճառով:
Այսօր հարցի քննարկման ընթացքում հիմնական զեկուցող Էդմոն Մարուքյանը ընթերցեց իրենց ներկայացրած հայտարարության նախագիծը՝ ներկայացնելով այն վնասները, որոնք Հայաստանն ունեցել է ԵՏՄ-ին անդամակցելուց հետո:
«Բացի այն, որ մենք վնասներ ենք ունեցել, ԵՏՄ համաձայնագիրը չի գործում, քաղաքացիների դեպորտացիան դարձել է սովորական, ընդ որում իրականացվում է կոպիտ խախտումներով»,- հայտարարեց Մարուքյանը՝ նշելով, նաև օր օրի տեղի ունեցող թանկացումները ոչ միայն իշխանության վատ կառավարման արդյունք են, այլև ԵՏՄ-ին անդամակցելու հետևանք:
Քննարկմանը ներկա էին նաև կառավարության ներկայացուցիչները, որոնք, սակայն, որևէ հարց չհնչեցրին ու ելույթ չունեցան:
Այնուամենայնիվ, նախագիծը բացասական եզրակացությամբ ընդգրկվեց հաջորդ լիագումար նիստի օրակարգ, որի ընթացքում հակիրճ անդրադարձ կլինի նախագծին, ապա քվեարկության կդրվի:
