Ինչո՞ւ հարց չի դրվում, ԱՊՀ-ն, ՀԱՊԿ-ը լքելու մասին. ԱԺ հանձնաժողովում ընթանում են «Ելք»-ի՝ ԵՏՄ-ն լքելու նախագծի քննարկումները

Ազգային ժողովի արտաքին հարաբերությունների հանձնաժողովում մեկնարկել է ընդդիմադիր «Ելք» խմբակցության Եվրասիական տնտեսական միությունից (ԵՏՄ) դուրս գալու գործընթաց սկսելու վերաբերյալ ԱԺ հայտարարության նախագծի քննարկումը:

«Ելք» խմբակցության հեղինակած այս նախագիծը  երկու ամիս առաջ ևս ներառվել էր արտաքին հարաբերությունների մշտական հանձնաժողովի նիստերի օրակարգ, սակայն չէր քնննարկվել հիմնական զեկուցող, «Լուսավոր Հայաստան» կուսակցության ղեկավար Էդմոն Մարուքյանի բացակայության պատճառով:

Այսօր հարցի քննարկման ընթացքում հիմնական զեկուցող Էդմոն Մարուքյանը ընթերցեց իրենց ներկայացրած հայտարարության նախագիծը՝ ներկայացնելով այն վնասները, որոնք Հայաստանն ունեցել է ԵՏՄ-ին անդամակցելուց հետո:

«Բացի այն, որ մենք վնասներ ենք ունեցել, ԵՏՄ համաձայնագիրը չի գործում, քաղաքացիների դեպորտացիան դարձել է սովորական, ընդ որում՝ իրականացվում է կոպիտ խախտումներով»,- հայտարարեց Մարուքյանը՝ նշելով նաև, որ օր օրի տեղի ունեցող թանկացումները ոչ միայն իշխանության վատ կառավարման արդյունք են, այլև ԵՏՄ-ին անդամակցելու հետևանք:

Ընդդիմադիր պատգամավորը հորդորեց իրենց մոտեցմանը չհակադարձել ահաբեկման փաստարկներով. «Պետք չէ խորհրդարանի ամբիոնից նոր ահաբեկումներ անել, մեր ժողովուրդն առանց այն էլ ցեղասպանություն տեսած ժողովուրդ է, ահաբեկված է»:

Հիմնական զեկուցողից «Ծառուկյան» խմբակցության պատգամավոր Արարատ Զուրաբյանը հետաքրքրվեց՝ ինչո՞ւ հարց չի դրվում ԱՊՀ-ն, ՀԱՊԿ-ը լքելու մասին. «Ընդհանրապես էդ գիծը կտրելու,պահանջելու Հայաստանի իշխանություններից նոր բանակցություններ սկսել Ասոցացման համաձյանագրի համար»:

«Նախագծի հիմնավորումներ բաժնում գոյություն ունի «Այլընտրանք» բաժին, որտեղ կա Ասոցացման համաձայնագիրը ավարտին հասցնելու տեսլական: Մենք ջատագովներն ենք Ասոցացման համաձայնագրի,այսինքն՝ այլընտրանքը ներկայացված է»,- պատասխանեց Էդմոն Մարուքյանը:

Ինչ վերաբերում է ԱՊՀ-ն, ՀԱՊԿ-ը լքելու պահանջին, պատգամավորը պարզաբանեց՝ Հայաստանն այս պահին չունի այլ անվտանգային մարմնի անդամակցելու օրակարգ, երբ ունենան, այն ժամանակ էլ նշված կառույցները լքելու հարցին ևս կանդրադառնան:

Արարատ Զուրաբյանն, այնուամենայնիվ, շարունակեց. «Այս կառույցներից մեկից դուրս գալու արձագանքը նույն հարթության մեջ է դիտարկվելու, պետք է իրոք ունենալ այլընտրանք նոր այդպիսի հարց բարձրացնել, որովհետև հակառակ դեպքում դիտարկվելու է որպես Հայաստանի հեռացում»:

Այս պահին քննարկումը շարունակվում է:

Մանրամասներն՝ ավելի ուշ:

Շողիկ Գալստյան