03.08.2026 | 18:32
Ավետիք Չալաբյանի վերաբերյալ քրեական վարույթի նախաքննությունն ավարտվել է․ ՔԿ
ՀՀ և Արցախի ԱԳ նախարարները ԼՂ կարգավորման վերջին զարգացումներն են քննարկել․ ՏԵՍԱՆՅՈՒԹ
04.07.2020 | 20:42
ՀՀ ԱԳ նախարար Զոհրաբ Մնացականյանն Արցախ կատարած աշխատանքային այցի շրջանակում այսօր հանդիպում ունեցավ Արցախի ԱԳ նախարար Մասիս Մայիլյանի հետ: Այս մասին տեղեկացնում է ՀՀ ԱԳՆ մամուլի ծառայությունը։
Աղբյուրի փոխանցմամբ՝ զրուցակիցները գոհունակություն հայտնեցին Հայաստանի և Արցախի ԱԳՆ-ների միջև արտաքին քաղաքական հարցերի շուրջ խորհրդակցությունների ծրագրի կատարման ընթացքի առնչությամբ։
Արտաքին քաղաքական գերատեսչությունների ղեկավարներն անդրադարձ կատարեցին Լեռնային Ղարաբաղի խաղաղ կարգավորման գործընթացի վերջին զարգացումներին և հունիսի 30-ին ԵԱՀԿ Մինսկի խմբի համանախագահների միջնորդությամբ և մասնակցությամբ՝ Հայաստանի և Ադրբեջանի ԱԳ նախարարների միջև կայացած տեսակոնֆերանսին: Այդ համատեքստում ԱԳ նախարար Մնացականյանը նշեց. «Մեզ համար սա լավ առիթ է՝ Արցախի նորընտիր իշխանությունների հետ ավելի առարկայական խորհրդակցելու և համադրելու մեր արտաքին քաղաքականության օրակարգի առաջնահերթությունների շուրջ առկա դիրքորոշումները, և առաջին հերթին, բնականաբար, Լեռնային Ղարաբաղի խաղաղ կարգավորման հարցում»:
Ընդգծելով խաղաղ կարգավորման գործընթացին Արցախի նորընտիր իշխանությունների ներգրավվման անհրաժեշտությունը՝ Հայաստանի ԱԳՆ ղեկավարը նշեց, որ ՀՀ կառավարությունը և վարչապետը մշտապես կարևորել են Արցախի լիարժեք մասնակցությունը խաղաղ գործընթացում: «Նախևառաջ դա զուտ գործնական հարց է, որովհետև խաղաղ կարգավորումը վերաբերում է Արցախի ժողովրդին: Սա անհերքելի իրողություն է, որը պահանջում է Արցախի ժողովրդի և նրանց կողմից ընտրված իշխանությունների ավելի ընդգծված ներկայություն և վերջիններիս մոտ խաղաղ գործընթացի հանդեպ սեփականության զգացման ամրապնդում»:
Խաղաղ գործընթացի միջավայրի ձևավորման և Արցախի ժողովրդի համապարփակ անվտանգության շարունակական ապահովման անհրաժեշտության համատեքստում ՀՀ ԱԳ նախարարը նշեց. «Մենք բազմիցս ընդգծել ենք, որ խաղաղ կարգավորումը որևէ այլընտրանք չունի: Ասելով դա՝ ընդգծում ենք նաև, որ և՛ Արցախի ժողովուրդը, և՛ Արցախի իշխանությունները ավելի քան վճռական են պաշտպանելու իրենց անվտանգությունը, իրենց անկախությունը և իրենց զարգացման իրավունքը»:
Նույն օրը ԱԳ նախարար Մնացականյանը հանդիպում ունեցավ նաև Արցախի ԱԳՆ անձնակազմի հետ, որի ընթացքում ներկայացրեց միջազգային և տարածաշրջանային զարգացումների վերաբերյալ Հայաստանի դիրքորոշումներն ու մոտեցումները, ԼՂ կարգավորման գործընթացի շուրջ վերջին զարգացումները։
