Լոս Անջելեսի առևտրի պալատը չեղարկել է  թուրքական բիզնես ֆորումը՝  Փոլ Գրեգորյանի բարձրացրած մտահոգության պատճառով

Լոս Անջելեսի առևտրի պալատը չեղարկել է մայիսի 25-ին կայանալիք «Լոս Անջելես-Թուրքիա բիզնես ֆորումը»․ գրում է asbarez.com-ը՝ մանրամասնելով, որ այն միտված էր զարգացնելու Լոս Անջելեսի և Թուրքիայի միջև գործարար կապերը։

Համաժողովը չեղարկվել է ի պատասխան Լոս Անջելեսի քաղաքային խորհրդի անդամ Փոլ Գրեգորյանի բարձրաձայնած մտահոգության՝ կապված Վաշինգտոնում անցած շաբաթ Թուրքիայի նախագահ Ռեջեփ Թայիփ Էրդողանի անվտանգության աշխատակիցների կողմից խաղաղ ցուցարարների վրա հարձակման հետ։ Հարձակումը դատապարտել էին և՛ հանրապետականները, և՛ դեմոկրատները, իսկ սենատոր Ջոն Մաքքեյնը Պետքարտուղարությանը պարզապես կոչ էր արել վտարել Թուրքիայի դեսպանին Միացյալ Նահանգներից։

Փոլ Գրեգորյանը ողջունել էր Լոս Անջելեսի առևտրի պալատի որոշումը․ «Ես շնորհակալություն եմ հայտնում Լոս Անջելեսի առևտրի պալատին՝ իմ դիմումին պատասխանելու և «Լոս Անջելես-Թուրքիա բիզնես ֆորումը» չեղարկելու համար:

Հիշեցնենք, որ ԱՄՆ մայրաքաղաք Վաշինգտոնում Թուրքիայի դեսպանի նստավայրի մոտ Ռեջեփ Թայիփ Էրդողանի` ԱՄՆ այցի դեմ բողոքող խաղաղ ցուցարարների վրա  հարձակում էր գործել  էրդողանամետ խումբը:

«Այդ տեսակ բռնություն ԱՄՆ-ի մայրաքաղաքում երբեք չէիք կարող ակնկալել։ Նմանատիպ բռնություն  հատուկ է միայն Էրդողանի Թուրքիային կամ մեկ այլ բռնապետության»,- ասել էր ԱՄՆ Հայ դատի հանձնախմբի (ANCA) գործադիր տնօրեն Արամ Համբարյանը՝ հավելելով․ «Սա անհանդուրժողականության այն տեսակն է, որ հատուկ է միայն Թուրքիան և այժմ էլ ներմուծվել է  Միացյալ Նահանգներ»։