10.09.2026 | 11:35
Թրամփը հայտարարել է, որ Իրանի հետ պատերազմը կավարտվի ԱՄՆ միջանկյալ «ընտրություններից անմիջապես հետո»
ԱԺ-ում ընթանում է ուսանողների և իշխանության ներկայացուցիչների միջև վիճահարույց օրինագծի շուրջ քննարկումը
Հասարակություն
22.11.2017 | 13:36
Ազգային ժողովում այժմ ընթանում է կլոր սեղան քննարկում՝ «Հանուն գիտության զարգացման» նախաձեռնության անդամների և Կառավարության և օրենսդիր մարմնի ներկայացուցիչների միջև: Քննարկման թեման տարկետման իրավունքի սահմանափակման հարցն է, ինչի դեմ բողոքող ուսանողները օրեր շարունակ դասադուլ էին անցկացնում, սակայն այդպես էլ որևէ արդյունքի չհասան:
Ազգային ժողովը նոյեմբերի 15-ին ընդունել է «Զինվորական ծառայության և զինծառայողի կարգավիճակի մասին» օրինագիծը: Օրինագծի ընդունումից հետո, սակայն, ուսանողներին ընդունեց ԱԺ փոխնախագահ Էդուարդ Շարմազանովը խորհրդարանի նախագահ Արա Բաբլոյանի հետ միասին:
Հանդիպման ընթացքում որոշվեց քննարկում կազմակերպել, որի ընթացքում ուսանողները իրենց մտահոգությունները ներկայացնելու հնարավորություն կստանան: Այսօրվա հանդիպմանը, որ նախագահում է ԱԺ փոխնախագահ Էդուարդ Շարմազանովը, ուսանողներից ներկա են հինգ հոգի: Ներկա են նաև Պաշտպանության փոխնախարար Արտակ Զաքարյանը, Կրթության և գիտության նախարար Լևոն Մկրտչյանը, Սոցիալական հարցերի հանձնաժողովի նախագահ Հակոբ Հակոբյանը և Գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Վարդան Բոստանջյանը, ինչպես նաև ՀՀԿ-ական պատգամավոր, պաշտպանության և անվտանգության հանձնաժողովի նախագահ Ֆելիքս Ցոլակյանը:
«Մենք պայքարում ենք հանուն գիտության ու կրթության զարգացման, հանուն մեր պետականության և անվտանգության ու պաշտպանության ամրապնդման: Համոզված եմ, որ գիտության և կրթության զարգացումը ու մեր երկրի պաշտպանունակության ամրապնդումը չի կարելի հակադրել միմյանց»,- մինչ քննարկման մեկնարկը՝ ընդգծեց հանդիպման նախաձեռնող Էդուարդ Շարմազանովը:
Քննարկման ընթացքում հիմնական զեկուցողներն են ՀՀ կրթության և գիտության նախարար Լևոն Մկրտչյանը և «Հանուն գիտության զարգացման» նախաձեռնության անդամներից մեկը:
