Մինչև մյուս տարվա գարուն համաճարակը լինելու է մեզ հետ․ մեզ հարկավոր է ձեր աջակցությունը․ վարչապետ. ՏԵՍԱՆՅՈՒԹ

Այսօր ամբողջ աշխարհում կորոնավիրուսի ճանաչելիության հետ կապված խնդիր կա, և մենք դրա հետ կապված շատ մեծ դիլեմաների և առեղծվածների ենք հանդիպում։ Պարետատան այսօրվա նիստից հետո հրավիրված ճեպազրույցում այս մասին ասաց ՀՀ վարչապետ Նիկոլ Փաշինյանը։

«Բայց մի բան ակնհայտ է․ մենք հստակ գիտենք, որ այդ վիրուսից խոցելի որոշակի խմբեր կան՝ քրոնիկ հիվանդություններ ունեցողներն ու մեր տարիքով հայրենակիցները, և մենք պետք է ամեն ինչ անենք՝ նրանց պաշտպանելու համար»,- հավելեց նա։

Վարչապետի խոսքով՝ աշխարհը շարունակում է հետազոտել հիվանդությունը, և հույս հայտնեց, որ մոտ ապագայում կգտնվի պատվաստանյութ․ «Բայց մասնագետները չեն բացառում, որ պատվաստանյութ չգտնվի։ Հետևաբար՝ ես ծայրահեղ ճիշտ եմ գնահատում մեր որդեգրած ռազմավարությունը՝ սովորել ապրել կորոնավիրուսի հետ համատեղ և զուգահեռ»։

Փաշինյանն ասաց՝ եթե նույնիսկ հիմա Հայաստանում ամենօրյա զրո դեպք ունենանք, այն պայմաններում, երբ կորոնավիրուսն աշխարհում առկա է, երբ բացենք սահմանները, կորոնավիրուսը ներթափանցելու է, իսկ այդ դեպքում մենք ավելի անպաշտպան կարող ենք լինել։

«Մենք գիտենք, որ գոնե մինչև մյուս տարվա գարուն համաճարակը լինելու է մեզ հետ։ Ես ինքս մեր որդեգրած ռազմավարության մեջ համոզված եմ, և այս ռազմավարությունը մենք շարունակելու ենք այնքան, ինչքան հնարավոր լինի։ Եվ որպեսզի սա հնարավոր լինի, մեզ՝ Կառավարությանը, ինձ անձամբ հարկավոր է ձեր աջակցությունը»,- հավելեց նա։

Մանրամասները՝ տեսանյութում։