01.11.2026 | 21:01
Սարգիս Ստեփանյանը՝ հինգերորդ անգամ աշխարհի չեմպիոն
Նուբարաշենի հոգեկան առողջության կենտրոնում 49 հոգու մոտ կորոնավիրուս է հաստատվել, 307 թեստավորում է իրականացվել
02.06.2020 | 20:19
Հոգեկան առողջության պահպանման ազգային կենտրոնում (Նուբարաշենի հոգեկան առողջության կենտրոն) իրականացված թեստավորման վերաբերյալ Առողջապահության նախարարությունից Factor.am֊ին նոր մանրամասներ են փոխանցել։
Մամուլի խոսնակ Ալինա Նիկողոսյանը հայտնել է, որ թեստավորումն իրականացվել է երեք փուլով։ Մայիսի 28-ին թեստավորվել է 51 հոգի, այդ թվում՝ ադմինիստրատիվ կազմը և բուժական բաժանմունքներում աշխատող ՀԱՊԱԿ աշխատակիցները։ Արդյունքում՝ 7 հոգու մոտ հաստատվել է հիվանդությունը։ Մայիսի 30-ին թեստավորվել է 101 հոգի, որից՝ նույն բաժանմունքի 54 պացիենտ և 47 աշխատակից։ Մայիսի 31-ին թեստավորվել է ևս 155 աշխատակից։ Այսպիսով, երեք օրվա ընթացքում կատարվել է 307 թեստավորում, որի արդյունքում հայտնաբերվել է կորոնավիրուսով վարակված 49 հոգի, նրանցից 9-ը պացիենտ է, իսկ 40-ը՝ ադմինիստրատիվ, տնտեսական և բուժական բաժանմունքների աշխատակիցներ։
Առողջապահության նախարարությունից Factor.am-ին փոխանցեցին, որ այս պահի դրությամբ վարակակիրներից որևէ մեկը չի ջերմում, գանգատներ չունեն, չկան COVID-19-ին բնորոշ այլ ախտանշաններ։ Վարակակիրները գտնվում են մշտական հսկողության ներքո։
Տեղեկացանք նաև, որ վարակված պացիենտներն առանձնացվել են առանձին տարածքում, ամբողջ կենտրոնի տարածքում իրականացվում են հակահամաճարակային միջոցառումներ։ Վարակված բոլոր աշխատակիցները մեկուսացվել են իրենց տներում, նրանց փոխարինելու են եկել առողջները։
Հիշեցնենք, որ Նուբարաշենի հոգեկան առողջության կենտրոնում վարակակիրների առկայության մասին Factor.am-ը գրել էր դեռ մայիսի 31-ին։
Նարեկ Կիրակոսյան
