19.01.2026 | 23:38
Ռուբիոն բարձր է գնահատել Ադրբեջանի կառավարության կողմից Հայաստան վառելիքի մատակարարումները
Խաչատրյանի անվան 16-րդ միջազգային մրցույթին կմասնակցի 13 երկրի 19 ջութակահար
Մշակույթ
01.06.2020 | 22:11
Խաչատրյանի անվան 16-րդ միջազգային մրցույթի նախընտրական փուլը հաղթահարել է և մրցույթին մասնակցելու իրավունք է ստացել 19 ջութակահար։ Մասնակիցների աշխարհագրությունը լայն է‚ նրանք ներկայացնում են Թայվանը‚ Կորեայի Հանրապետությունը‚ Հոնկոնգը‚ Ռուսաստանը‚ Ֆրանսիան‚ Լյուքսեմբուրգը‚ Կանադան‚ Դանիան‚ Շվեդիան‚ Ճապոնիան‚ Ավստրիան‚ Հունաստանը‚ Հայաստանը։
Հիշեցնենք‚ որ խաչատրյանական մրցույթը կմեկնարկի հունիսի 6-ին‚ այն տեղի կունենա ջութակ մասնագիտությամբ։ Մրցույթն այս տարի կկայանա առցանց՝ ներգրավելով բարձր տեխնոլոգիաների և արհեստական բանականության ընձեռած հնարավորությունները։
Մրցույթը կկայանա երեք փուլով։ Սահմանված են հետևյալ մրցանակները. առաջին մրցանակակիրը կարժանանա 10000 ԱՄՆ դոլարին համարժեք դրամական պարգևի‚ երկրորդ տեղը զբաղեցրած մասնակիցը կպարգևատրվի 5000 ԱՄՆ դոլարին համարժեք դրամով‚ իսկ երրորդ մրցանակակիրը կստանա 3000 ԱՄՆ դոլարին համարժեք դրամական պարգև։ Կշնորհվեն նաև մի շարք հատուկ մրցանակներ‚ մասնավորապես՝ «Հանդիսատեսի համակրանք»‚ Լյուդվիգ վան Բեթհովենի ռոմանսի‚ Նիկոլո Պագանինիի կապրիսի լավագույն մեկնաբանության համար և այլն։ Ի դեպ‚ Լյուդվիգ վան Բեթհովենի ռոմանսները մեծ կոմպոզիտորի 250-ամյա հոբելյանի շրջանակներում ընդգրկված են մրցույթի 1-ին փուլում որպես պարտադիր ծրագիր։
Հատուկ մրցանակ է սահմանել նաև մրցույթի գործընկեր «Պարմա» ձայնագրման ընկերությունը. խաչատրյանական ստուգատեսի հաղթողը ձայնագրման պայմանագիր կկնքի «Պարմայի» հետ։ PARMA Recordings-ի գործադիր տնօրեն Բոբ Լորդը‚ որ նաև մրցույթի ժյուրիի անդամ է‚ հաջողություն է մաղթում բոլոր մասնակիցներին և նշում‚ որ իրենք պատրաստ են աջակցել նոր սերնդի տաղանդավոր երաժիշտներին։
