18.08.2026 | 23:01
Չեմ հիշում իմ աշխատանքային պարտականություններում օրենքով ինչ էր նախատեսված. Չախոյան. ՏԵՍԱՆՅՈՒԹ
Մարմաշեն համայնքում ֆուտբոլ խաղալիս 20-ամյա երիտասարդ է մահացել
Հասարակություն
28.05.2020 | 15:16
Շիրակի մարզի Մարմաշեն համայնքում նախօրեին դժբախտ դեպք է տեղի ունեցել․ ֆուտբոլ խաղալիս 20-ամյա երիտասարդ է մահացել։ Նա Մարմաշեն խոշորացված համայնքում ընդգրկված Վահրամաբերդ գյուղի բնակիչ է։
Դեպքը տեղի է ունեցել երեկ երեկոյան ժամը 18։30-19։00 սահմաններում։ Այս մասին Factor.am-ի հետ զրույցում ասաց Մարմաշեն համայնքի ղեկավար Կարեն Արշակյանը։
«Մարմաշենն ու Վահրամաբերդը հարակից գյուղեր են, մոտ 2 կմ է հեռավորությունը։ Նոր ֆուտբոլի դաշտ ենք կառուցել, դեռ չենք էլ վերջացրել։ Ֆուտբոլի դաշտում, երևի, թիմերի են բաժանվել՝ Վահրամաբերդ ու Մարմաշեն, ֆուտբոլ են խաղացել։ Տեսել են, որ վատ է զգացել, վազել օգնել են, ջուր բան են բերել, տեսել են՝ էլ չի շնչում։ Նստացրել են մեքենան, տեղափոխել հիվանդանոց, այնտեղ արդեն արձանագրել են, որ մահացել է»,- ասաց Կարեն Արշակյանը։
Երիտասարդի մահվան հանգամանքները դեռևս պարզ չեն, նախնական տվյալներով՝ մարմնին հարվածի հետքեր չեն եղել։
«Այսօր առավոտ ժամը 5-ի դրությամբ, դատաբժշկի նախնական տվյալներով, հարվածի ինչ-որ ծանր հետքեր, կապտուկներ չկան, թևի վրա մի փոքր քերծվածք է եղել, բայց դա հնարավոր չի, որ մահվան պատճառ լիներ։ Դիահերձումը կավարտվի, եզրակացությունը կտան»,- ասաց համայնքնի ղեկավարը։
Նա նաև նշեց, որ ընտանիքում օրերս ևս մի դժբախտ դեպք է տեղի ունեցել․ մահացել է երիտասարդի քրոջ ամուսինը։
«Երկու քույր ունի։ Մի հատ էլ ցավալի բան կա իրենց ընտանիքի հետ կապված, քրոջ ամուսինն է մահացել ՌԴ-ում։ Այսօր, երևի, կբերեն։ 31 տարեկան էր»,- ասաց Կարեն Արշակյանը։
Ոստիկանությունը ներկայում քննություն է իրականացնում՝ երիտասարդի մահվան հանգամանքները պարզելու համար։ Մարմաշեն համայնքի ղեկավարի տեղեկացմամբ՝ ֆուտբոլ խաղացած երիտասարդները հարցաքննվել են, կան բերման ենթարկվածներ։ Քննությունը շարունակվում է։
Էմմա Չոբանյան
