«Առինջ մոլի» առևտրականները պահանջում են ՊԵԿ նախագահի և Կարեն Կարապետյանի հրաժարականը. նրանց աջակցում են «Ծառուկյան» խմբակցության պատգամավորները

Այսօր Ազգային ժողովի դիմաց մի քանի ժամ շարունակ բողոքի ակցիա էին անցկացնում տասնյակ առևտրականներ՝ պահանջելով, որ Պետական եկամուտների կոմիտեն դադարեցնի հարկային ստուգումներն «Առինջ մոլում»:

Վրդովված առևտրականների պնդմամբ՝ հարկային մարմնի աշխատակիցները ստուգումներն իրականացնում են վիրավորելով ու քաշքշելով նրանց: Անգամ պնդում են, որ հերթական ստուգումներից մեկի ժամանակ վրաեթրի են ենթարկել մի առևտրականի, որը թեթև, բայց վնասվածքներ է ստացել:

«Այսուհետև չենք լռելու, երբ գառը գժվում է, դառնում է խելագար, հերիք է՝ ինչքան լռեցինք, թող իրենք ցույց տան՝ իրենց ունեցվածքը ոնց են կուտակել: Էդ լավ ժամացույցները կապելու փոխարեն, թող գործարարններ բացեն»,- Factor.am-ի հետ զրույցում ասաց «Համերաշխություն» ՀԿ նախագահ Արմեն Մինասյանը՝ ընդգծելով, որ իրենք պահանջում են ոչ միայն ՊԵԿ նախագահի, այլև վարչապետ Կարեն Կարապետյանի հրաժարականը:

Առևտրականներին աջակցող և նրանց հետ պարբերաբար հանդիպող «Ծառուկյան» խմբակցության պատգամավորներն առաջարկում են ստեղծել ԱԺ քննիչ հանձնաժողով , որը կուսումնասիրի գազի և բենզինի ոլորտում առկա մոնոպոլիան: «Մենք սենսացիոն բացահայտումներ ենք խոստանում»,- ցուցարարների հետ հանդիպմանը խոստացավ «Ծառուկյան» խմբակցության պատգամավոր Նաիրա Զոհրաբյանը:

Առևտրականների հետ հանդիպման եկավ նաև ԱԺ «Ելք» խմբակցության ղեկավար Նիկոլ Փաշինյանը, որն առաջարկեց հարցն այլ ձևաչափով քննարկել՝ խնդրի բուն էությունը հասկանալու համար:

Ընդդիմադիր ուժի ղեկավարը Factor.am-ի հետ զրույցում ասաց՝ իրենք ևս կմիանան հանձնաժողովի ստեղծման առաջարկին:

Մանրամասները՝ տեսանյութում: