«Բացարձակ տեղեկություն չունեմ, թե ՔԿ-ում ինչ ոլորտներ եմ համակարգելու». Արգիշտի Քարամյան

«Չեմ կարող ասել, թե որն էր պատճառը, որոշումը պարոն վարչապետի տիրույթում է»,-այս մասին Factor.am-ին ասաց ՊՎԾ պետի տեղակալի պաշտոնից երեկ ազատված Արգիշտի Քարամյանը՝ պատասխանելով իր ազատման եւ այլ պաշտոնի նշանակման մասին հարցին։ Նա, հիշեցնենք, այսօրվանից զբաղեցնում է Քննչական կոմիտեի նախագահի տեղակալի պաշտոնը:
Factor.am-ին տեղեկություն էին փոխանցել, որ Քարամյանն ինքն է ձգտել, որ ՊՎԾ-ից ՔԿ տեղափոխվի: Նրանից հետաքրքրվեցինք՝ արդյո՞ք որեւէ առաջարկություն արել է ղեկավարությանը տեղափոխման համար: «Ոչ, որեւէ նման բան չկա: Բոլոր կառույցներն էլ կարեւոր են մեր պետականաշինության գործում»:

Նշենք, որ Արգիշտի Քարամյանը զբաղեցնելու է ՔԿ նախագահի 5-րդ տեղակալի պաշտոնը, որը ստեղծվել է ապրիլի 30-ին: Քարամյանից հետաքրրքվեցինք, թե ինչ ոլորտներ է համակարգելու: «Բացարձակ տեղեկություն չունեմ»,- ասաց նա:
Տարակուսեցինք՝ եթե պարտականությունները հայտնի չեն, ապա ինչպես է աշխատանքի անցել: «Ես դեռ ՊՎԾ-ում չեմ ավարտել, այս պահին դեռ ՊՎԾ-ում եմ, գործեր կան ավարտելու»: Ճշտող հարցին՝ ՔԿ նախագահի տեղակալ լինելով ՊՎԾ-ու՞մ է, Արգիշտի Քարամյանը դրական պատասխան տվեց: «Նորմալ է, ինչն է խնդիրը»:

Անդրադառնալով տեղեկություններին, թե ՔԿ նախագահի 5-րդ տեղակալի պաշտոնը հատուկ իր համար է ստեղծվել, Քարամյանն ասաց․ «Չեմ կարծում, որ որեւէ մեկի համար հնարավոր է պաշտոն ստեղծել»:

Հիշեցնենք, որ Արգիշտի Քյարամյանը ՊՎԾ-ում աշխատանքի էր անցել 2019 թվականի ապրիլի 10-ին, իսկ պետի պաշտոնակատար նշանակվել ապրիլի 26-ին:

Նարեկ Կիրակոսյան