Աթլետիկայի համաշխարհային ֆեդերացիան ֆինանսական օգնություն է նախատեսում մարզիկներին. արդյոք Հայաստանը և՞ս կկարողանա օգտվել

«Համաշխարհային ֆեդերացիայի կողմից մենք դեռևս տեղեկություն չենք ստացել՝ արդյոք հայ մարզիկները կարողանալո՞ւ են օգտվել այդ աջակցությունից, թե ոչ: Որոշումը կայացնում է համաշխարհային ֆեդերացիան ու իր հերթին տեղյակ պահում ազգային ֆեդերացիաներին»,- ասում է Նարինե Շահբազյանը:

Ավելի վաղ հայտնել էինք, որ Աթլետիկայի համաշխարհային ֆեդերացիան  արհեստավարժ մարզիկներին օգնելու նպատակով ստեղծել է միջազգային հիմնադրամ։ Այն կազմում է 500 հազար ԱՄՆ դոլար: Միջոցները հատկացրել է Մոնակոյի արքայազն Ալբեր երկրորդը, ով  կազմակերպության  պատվավոր նախագահն է։

Նարինե Շահբազյանի խոսքով, հայ մարզիկներն այս օրերին անհատական մարզումներ են անցկացնում. աթլետիկայի բոլոր մրցաշարերը ոչ թե հետաձգվել, այլ առհասարակ չեղարկվել են:

«Այս տարի հավանաբար կանցկացնենք միայն աթլետիկայի Հայաստանի առաջնությունը: Այն սովորաբար անցկացնում էինք մայիսին, բայց այս տարի, երևի, կտեղափոխենք փոքր-ինչ ավելի ուշ: Սա այն մարզաձևն է, որի հավաքները չենք կարող 20 հոգուց պակաս մարզիկով կազմակերպել: Այնպես որ, պետք է սպասենք, տեսնենք՝ ինչ որոշումներ կընդունվեն կապված արտակարգ դրության և սահմանափակումների հետ»,- եզրափակեց իր խոսքը Նարինե Շահբազյանը:

Ավելի վաղ, հիշեցնենք, չեղարկվել էր աթլետիկայի Եվրոպայի առաջնությունը: Մրցումները պետք է անցկացվեին օգոստոսի 26-ից 30-ը Փարիզում՝ «Շարլետի» մարզադաշտում: 2020թ․ ապրիլի 6-ից մինչև նոյեմբերի 30-ը նախատեսված Օլիմպիական խաղերի որակավորման մրցումներն էլ կասեցվեցին:

Որակավորման մրցաշարերի նոր ժամանակացույցը կորոշվի դեկտեմբերի 1-ից: