03.08.2026 | 23:30
Տաթև-Լծեն ավտոճանապարհին բեռնատարը դուրս է եկել երթևեկելի հատվածից և բախվել հողաթմբին
Ծառատնկման ծրագրի մասնակիցներն օրական նվազագույնը 10.000 դրամ կարող են աշխատել. փոխնախարար. ՏԵՍԱՆՅՈՒԹ
Հասարակություն
30.04.2020 | 16:51
Ծառատնկման ծրագիրը մշակելիս և յուրաքանչյուր կտրոնի ու տնկված ծառի համար գումար սահմանելիս հաշվի առնվել է, թե քաղաքացիներն օրական քանի ծառ կարող են տնկել: Այսօր հրավիրված ասուլիսում ասաց ՀՀ շրջակա միջավայրի փոխնախարար Վարդան Մելիքյանը՝ լրագրողներից մեկի հարցին ի պատասխան:
«Մենք նախնական մեր աշխատակիցներին խնդրել էինք գնահատել, թե որքան կտրոն կկարողանանք տնկել ամեն օր: Նվազագույնը 200 կտրոն հնարավոր է մեկ օրվա ընթացքում պատրաստել և տնկել: Այսինքն՝ օրական ծրագրի մասնակիցները կաշխատեն մինչև 10.000 դրամ»,- ասաց պաշտոնյան:
Նա հավելեց նաև, որ սա նվազագույն թիվն է:
Հիշեցնենք, որ Կառավարությունն այսօրվա նիստում հաստատեց կորոնավիրուսի տնտեսական հետևանքների չեզոքացման 15-րդ միջոցառումը։ Այս միջոցառման նպատակն է՝ բնապահպանական խնդիրներ լուծելու միջոցով գյուղատնտեսական ոլորտում ժամանակավոր աշխատատեղեր ստեղծել: Ըստ այդմ, կորոնավիրուսի տարածման հետևանքով առաջացած դժվարությունների արդյունքում սոցիալական խնդիրների առջև կանգնած բնակչությանը ծառատնկման աշխատանքներ կատարելու դիմաց վճար կտրամադրվի:
Առաջարկվում է Հայաստանի բարձրադիր գոտիներում ուռենու տեղական տեսակների կտրոնների միջոցով գետերի հովիտներում հիմնել ափապաշտպան անտառաշերտեր՝ աշխատանքներում լայնորեն ներգրավելով տեղական բնակչությանը՝ այդպիսով ստեղծելով լրացուցիչ աշխատատեղեր, մեղմելով բնակչության եկամուտների կրճատման հետ կապված վտանգները։
Մանրամասները՝ տեսանյութում:
