Բանավեճ Ավինյանի և Փաշինյանի միջև. ունենք նոր մեքենաներ, բայց ոնց որ ֆինանսավորենք հին «զապոռոժեցները». ՏԵՍԱՆՅՈՒԹ

Տնկարանային տնտեսությունները պետք է զարգացնենք, բայց կա տնկիների որակի հարցը: Ցավոք, այսօր կան բազմաթիվ դեպքեր, երբ քաղաքացիները տնկի են առնում, 4-5 տարի հետո պարզվում է, որ այդ տնկին չունի անհրաժեշտ որակը: Այս մասին այսօր՝ ապրիլի 30-ին Կառավարության նիստում նշեց վարչապետ Նիկոլ Փաշինյանը:

«Կստացվի, որ գյուղատնտեսությունը դառնում է անարդյունավետ, որովհետև մարդը 4-5 տարի ժամանակ, փող կորցրեց, արդյունքում պարզվեց՝ տնկին այն որակը չունի, որ այդ բերքը տա: Դրա համար նախ կստեղծենք տնկիների որակի սերտիֆիկացման համակարգ, և երբ համոզվենք, որ մեխանիզմները կան, ծրագիրը կգործարկենք»,- ասաց նա:

Փոխվարչապետ Տիգրան Ավինյանը հարց ուղղեց՝ արդյո՞ք խոսքը նոր ավանդական այգիների ֆինանսավորման մասին է, ինչին վարչապետը դրական պատասխան տվեց՝ հավելելով, որ խոսքը ծիրանի, դեղձի և թզի մասին է. «Փորձը ցույց է տալիս, որ ծիրանի, դեղձի և թզի դեպքում ինտենսիվ այգիների բերքը շուկայում մրցունակ չէ, չի կարողանում փոխարինել ավանդական ծիրանի այգիներին»:

Տիգրան Ավինյանը չհամաձայնեց՝ նշելով, թե ինչու ֆինանսավորել ավանդական այգիները, որը բերք է տալու 4 տարի հետո, երբ ինտենսիվ այգիների բերքը կարող է լինել երկու տարի հետո, նաև ավելի խիտ են տնկվում ծառերը. «Այսինքն՝ մենք ունենք նոր տեսակի մեքենաներ, բայց գնանք սկսենք ֆինանսավորել հին «Զապորոժեցները»»:

Փաշինյանը նշեց, որ Եվրոպայում և Հայաստանում աճեցրած ծիրանների միջև որակական խիստ տարբերություն կա:

Մանրամասները՝ տեսանյութում: