20.01.2026 | 19:33
Լավրովը հայտարարել է, որ ԱՄՆ-ը չի կատարել Mariner լցանավի անձնակազմից երկու ռուսներին ազատ արձակելու խոստումը
Բանկային գաղտնիքի շուրջ նոր զարգացումներ․ իշխանությունը չի նահանջում, ընդդիմությունը՝ ահազանգում է. ՏԵՍԱՆՅՈՒԹ
Քաղաքականություն
23.04.2020 | 20:21
Իշխանությունը կրկին շրջանառության մեջ է դրել է «Բանկային գաղտնիքի մասին» օրենքում փոփոխություն կատարելու վերաբերյալ օրենքի նախագիծը։ Առաջարկվում է 1996 թվականին ընդունված Հարկային օրենսգրքի 13֊րդ հոդվածը փոփոխել՝ սահմանելով, որ բանկն իր հաճախորդների վերաբերյալ բանկային գաղտնիք կազմող տեղեկությունները, սույն օրենքին համապատասխան, տրամադրում է Հայաստանի Հանրապետության հարկային մարմիններին՝ հարկային մարմնի ղեկավարի օրինական, հիմնավորված և պատճառաբանված որոշման հիման վրա՝ բացառապես հարկային մարմնի իրավասության շրջանակներում իրականացվող հարկային հսկողության նպատակներին համապատասխան որպես տեղեկություն օգտագործելու նպատակով:
Օրինագծի 2-րդ կետով սահմանվում է, որ Բանկային գաղտնիք կազմող տեղեկությունները հարկային մարմնին ներկայացվում են Հայաստանի Հանրապետության կենտրոնական բանկի և հարկային մարմնի համատեղ սահմանած կարգով:
Օրինագիծը հեղինակել է Պետեկամուտների կոմիտեն։ Ընդդիմադիր «Լուսավոր Հայաստանի» ղեկավարը դեմ է նման օրինագծի ընդունմանը։ Էդմոն Մարուքյանը շեշտում է՝ նախագծով իշխանությունը գնում է բանկային համակարգի փլուզման ճանապարհով։ Մարուքյանը պնդում է՝ չեն կարող որպես օրինակ բերել որևէ քաղաքակիրթ երկրի փորձ, որտեղ հարկային մարմինը մուտք ունի քաղաքացիների բանկային հաշիվներ։
Մինչդեռ իշխող խմբակցության պատգամավոր Բաբկեն Թունյանը հորդորում է չշտապել եզրահանգումների գալ. ասում է՝ նախագիծը դեռևս հանրային քննարկման է դրված և դա հենց այն նպատակով է, որպեսզի հնարավոր դիտողություններն օրինագծի հեղինակները հաշվի առնեն։
Մանրամասները՝ տեսանյութում:
Մերի Մարտիրոսյան
