Արվեստը կարող է այցելել բակեր և ծայրամասեր. 500 միլիոնի դրամաշնորհային ծրագրերը չեն չեղարկվի. ՏԵՍԱՆՅՈՒԹ

Կրթության, գիտության, մշակույթի և սպորտի նախարարությունն առաջին մրցութաշրջանով արդեն իսկ հաստատել է դրամաշնորհային ծրագրեր, ընդհանուր առմամբ՝ 56 հայտ և  կորոնավիրուսով պայմանավորված արտակարգ դրության պայմաններում  դեռևս չի պատրաստվում չեղարկել դրանք. որքանով արդարացված կլինի նախարարության ռիսկն ու լավատեսությունը և ինչ ճակատագիր կունենան նախագծերը, ցույց կտա ժամանակը, ամեն դեպքում արդեն իսկ հաստատված նախագծերի հետ տարվում է աշխատանք՝ ծրագրերի իրականացման ռիսկերը գնահատելու, նախահաշիվներում հնարավոր փոփոխություններ իրականացնելու և դրանք ստեղծված իրավիճակին ադապտացնելու նպատակով:

Փոխնախարար Արա Խզմալյանը Factor.am-ին տեղեկացրեց, որ դրամաշնորհային մրցույթի առաջին մրցութաշրջանի ընդհանուր բյուջեն կազմել է 500 միլիոն դրամ:

Եվ չնայած այն հանգամանքին, որ երաժշտարվեստը ենթադրում է կոլեկտիվ գործունեություն, որն արտակարգ դրության պայմաններում ամենաշատ տուժողներից է, հաստատված հայտերից ամենաշատ ֆինանսները հատկացվել է հենց  երաժշտական ոլորտի նախագծերին, քանի որ դրանց մեջ մեծ թիվ են կազմում միջազգային փառատոներն ու միջոցառումները, որոնք նախարարությունը դեռևս չի պատրաստվում չեղարկել:

Նախարարությունում հույս ունեն, որ մինչև միջազգային այս և այլ  նախագծերի իրականացումը կորոնավիրուսը նահանջած կլինի: Ի դեպ, դրանցից շատերի  անցկացման ժամկետներն արդեն իսկ  նախատեսում են հետաձգել:  Փոխնախարարը շեշտեց՝ նախագծերը կչեղարկվեն այն դեպքում, եթե կորոնավիրուսով վարակվածների թիվը Հայաստանում հասնի այնպիսի շեմի, որի պարագայում նման խոշոր նախագծերի իրականացումն անհնար կլինի: Եթե դա պատահի, տվյալ նախագծերին հատկացված ֆինանսները կվերադարձվեն պետական բյուջե:

Արա Խզմալյանի խոսքով՝ ներկայիս պայմաններում ամենաշատը կաշկանդված են երգչախմբերը, նվագախմբերը, պարախմբերը, թատերախմբերը, իսկ օրինակ, նկարիչները, որոնք անհատ ստեղծագործողներն են, գործելու հնարավորություններ ունեն: Կինոյի ոլորտը ևս հեռահար հաղորդակցության մեծ շանսեր ունի: Ի դեպ, նախատեսվում է, որ մի շարք կինոնախագծեր կադապտացվեն այնպիսի ձևաչափի, որը չի ենթադրում  զանգվածային ներկայություն:

Թեև թատերարվեստը ենթադրում է կոլեկտիվ գործունեություն, այն ևս ունի հեռահար հաղորդակցություն ապահովելու որոշակի շանսեր:

Այս օրերին նախարարությունը ստանում է նաև մեծ թվով հայտեր, որոնք վերաբերում են  արվեստի բնագավառում հեռավար  կրթության իրականացմանը: Կա, օրինակ, առաջարկ՝ արվեստի դպրոցների ուսուցիչների և աշակերտների վերապատրաստման ծրագիրն օնլայն տիրույթ տեղափոխելու մասին:

Նշենք, որ նախարարությունն արդեն իսկ հայտարարել է դրամաշնորհային երկրորդ մրցույթը, որի վերջնաժամկետը, իրավիճակից ելնելով,  երկարաձգել է մինչև մայիսի 5-ը: Առաջնահերթություն կտրվի այն ծրագրերին, որոնք հնարավոր կլինի իրականացնել առցանց ձևաչափով, անհրաժեշտության դեպքում տեղափոխել թվային տիրույթ:

Աննա Բաբաջանյան