Ուսանողները դասադուլը չեն դադարեցնի. ԿԳ նախարարը նրանց չհամոզեց

Այսօր դասադուլ հայտարարած ուսանողները՝ «Հանուն գիտության զարգացման նախաձեռնության» անդամների առաջնորդությամբ,  հանդիպեցին ԿԳ նախարար Լևոն Մկրտչյանի հետ: Շուրջ երկու ժամ տևած հանդիպման ընթացքում քննարկվեցին ուսանողների մտահոգությունները, նախարարը պատասխանեց նրանց հարցերին:

Լևոն Մկրտչյանը դասադուլավորներին հորդորեց իրենց մտահոգությունները գրավոր ներկայացնել, ինչին ի պատասխան՝ նախաձեռնության անդամները հայտարարեցին, որ իրենք ընդհանրապես այդ  սկզբունքին դեմ են և մտավախություն ունեն, որ մինչև իրենց  պատասխանելն՝ օրենքն արդեն կընդունվի: 

Ուսանողները պահանջեցին հետաձգել օրենքի նախագծի քննարկումը ԱԺ-ում, Լևոն Մկրտչյանը, սակայն, շարունակեց պնդել, որ վիճահարույց օրենքի նախագիծը չի վերանայվելու, նրա համոզմամբ՝ տարկետման վերացումը որևէ կերպ չի վնասելու գիտությանը:

Նախարարը ուսանողներին կոչ արեց դադարեցնել բողոքի ակցիան և վերադառնալ բնականոն դասապրոցեսի: Ի պատասխան՝ ուսանողները հայտարարեցին, որ դասադուլը չեն դադարեցնելու, ԿԳ նախարարին էլ կոչ արեցին միանալ իրենց: Իսկ «Հանուն գիտության զարգացման նախաձեռնության» անդամ Դավիթ Պետրոսյանը վրդովված դիմեց նախարարին. «Ուղղակի ապշեցնում եք: Այդքան խնդիրներ ենք բարձրացնում, իսկ Դուք նման հայտարարություն եք անում…Մենք գնանք մեր դասադուլը շարունակենք, պարոն Մկրտչյան: Փորձը ցույց է տալիս, որ երբ  դասադուլ ենք  անում, մեզ հետ հանդիպում եք, մինչդեռ մեր բաց նամակին չեք պատասխանել»:  «Եթե բաց նամակի փոխարեն նամակն ուղղակի մեզ ուղարկած լինեիք, վաղուց այս հանդիպումը կազմակերպված կլինեինք»,- արձագանքեց Լևոն Մկրտչյանը:

Դավիթ Պետրոսյանն էլ հայտարարեց, որ իրենք փորձելու են շարունակական բողոքի ակցիաներով մինչև վիճահարույց օրենսդրական նախագծի երկրորդ ընթերցմամբ քվեարկությունը՝ ստեղծել լայն հարթակ, որտեղ կքննարկվեն իրենց մատնանշած մտահոգություններն ու կտրվեն հստակ պատասխաններ:

Այսօրվա բողոքի ակցիան ուսանողներն ավարտեցին՝ մեջքով շրջվելով դեպի ԿԳ նախարարությունը: Վաղն առավոտյան նրանք կշարունակեն դասադուլը, պլանավորված է նաև բողոքի երթով շարժվել դեպի կառավարություն:

Factor.am-ը կշարունակի ուղիղ հեռարձակմամբ ներկայացնել ուսանողների բողոքի ակցիան, մանրամասներին ծանոթանալու համար՝ հետևեք հեռարձակմանը: