Ի՞նչ է նշանակում կանչել Պաշտպանության նախարարություն, պարո՛ն նախարար, Սերժ Սարգսյանը գնաց ԵՊՀ, Դուք էլ գնացեք. Արարատ Միրզոնյան

Ազգային ժողովի «Ելք» խմբակցության պատգամավոր Արարատ Միրզոյանը ողջունում և դրական է գնահատում ուսանողների՝ դասադուլ իրականացնելու նախաձեռնությունը:

Factor.am-ի հետ զրույցում պատգամավորը հիշեցրեց՝ Պաշտպանության նախարարության կողմից 2004 թվականին համանման օրինագիծ էր ներկայացվել: Այն ժամանակ ևս ուսանողական շարժում էր ձևավորվել՝ հասնելով նրան, որ օրինագիծը չեղարկվի:

Այսօր արդեն երկրորդ օրն է՝ ինչ հարյուրավոր ուսանողներ դասադուլ են անցկացնում՝ պահանջելով պահպանել տարկետման իրավունքի տրամադրման գործող կարգը: «Ուսանողական ընդվզումն ընդհանրապես շատ դրական տենդենց է: Ուսանողները պետք է լինեն ազատ, հավանեն կամ չհավանեն այս կամ այն օրենքի նախագիծը: Նրանք իրավունք ունեն դասադուլներ անել: Քաղաքակիրթ երկրներում էլ տեսնում ենք, երբ ուսանողներին ջղայնացնում են, ինչ է լինում, այնպես որ՝ կեցցե՛ն ուսանողները»,- ասաց ընդդիմադիր պատգամավորը:

Ի դեպ, ՊՆ նախարար Վիգեն Սարգսյանն Արարատ Միրզոյանին օրեր առաջ մեղադրեց դասադուլներ հրահրելու մեջ, պատգամավորն այս առնչությամբ պարզաբանեց՝ ինքը որպես 2004 թվականի՝ «Հանուն գիտության զարգացման» նախաձեռնության անդամ, աջակցություն է հայտնել այս նոր շարժմանը: Բացի այդ՝ նաև պաշտոնական հայտարարություն են տարածել:

«Այսօր ուսանողները գործում են ինքնուրույն, ունեն բավարար ինտելեկտուալ հիմք և կարողանում են ինքնուրույն որոշել ինչ անել կամ չանել: Ինչ վերաբերում է իմ և իմ ընկերների հրահրելուն, ապա ես ուզում եմ պաշտոնապես հայտարարել՝ եթե մենք իսկապես հրահրեինք, ապա այսօր շարժման մասնակիցների թիվը մեկ զրոյով ավել կլիներ: Իհարկե, չի բացառվում, որ ինչ-որ պահից մենք իսկապես սկսենք հրահրել» ,- ասաց Արարատ Միրզոյանը:

Factor.am-ի հարցին՝ ինչո՞ւ «Ելք» դաշինքը՝ որպես նախագծին դեմ քվեարկած միակ քաղաքական ուժ, ուսանողներին չի աջակցում՝ միանալով նրանց պայքարին, պարոն Միրզոյանը վստահեցրեց՝ իրենց քաղաքական ուժը անհրաժեշտության դեպքում աջակցություն կցուցաբերի ուսանողներին:

Արարար Միրզոյանն անդրադարձավ նաև Պաշտպանության նախարար Վիգեն Սարգսյանի կողմից դասադուլավորներին հանդիպման հրավիրելուն՝ ընդգծելով, որ նախարարն ինքը պետք է ուսանողների հետ հանդիպման գնա, ինչպես 2004 թվականին դա արեց այն ժամանակվա ՊՆ նախարար Սերժ Սարգսյանը:

Հարցազրույցն ամբողջությամբ՝ տեսանյութում:

Շողիկ Գալստյան