30.04.2026 | 17:50
Նահանջ՝ 16 տեղով. ինչու է ՀՀ-ն զիջել դիրքերը մամուլի ազատության ինդեքսում․ ՏԵՍԱՆՅՈՒԹ
Արցախում նոր կորոնավիրուսի տարածման կանխարգելման աշխատանքները շարունակվում են
16.03.2020 | 16:51
Արցախի Հանրապետության պետական նախարար, նոր կորոնավիրուսի տարածման կանխարգելման աշխատանքները համակարգող միջգերատեսչական հանձնաժողովի նախագահ Գրիգորի Մարտիրոսյանը առողջապահության նախարար Արայիկ Բաղրյանի և կրթության, գիտության և սպորտի նախարար Նարինե Աղաբալյանի հետ հանդես է եկել մամուլի ասուլիսով:
Պետական նախարարը հայտարարել է, որ կորոնավիրուսով վարակման դեպք Արցախում չի արձանագրվել: Հանձաժողովը շարունակում է կանխարգելման ուղղությամբ համալիր միջոցառումները: Մասնավորապես, կասեցվել է արտասահմանյան զբոսաշրջիկներին մուտքի արտոնագրի տրամադրման գործընթացը, ներքաղաքային տրանսպորտը ախտահարվում է օրական երկու անգամ, շահագրգիռ գերատեսչություններն էլ շարունակում են մշտական կապի մեջ մնալ ՀՀ-յան գործընկերների հետ:
Գ.Մարտիրոսյանն անդրադարձել է հանրապետության տարածքում նոր կորոնավիրուսի տարածման կանխարգելման աշխատանքների շրջանակներում ԱՀ կառավարության կողմից ձեռնարկվող միջոցառումներին: Հանձնարարվել է սույն թվականի մարտի 16-ից մինչև ապրիլի 16-ը, ելնելով ծանրաբեռնվածության աստիճանից, սահմանափակել պետական կառավարման համակարգի և նրանց ենթակայության տակ գտնվող հաստատությունների աշխատակիցների մի մասի աշխատանքի ներկայանալը՝ դիտարկելով աշխատանքային պարտականությունները հեռահար եղանակով կազմակերպելու տարբերակը: Խոսքը վերաբերում է հատկապես նախադպրոցական, դպրոցական տարիքի և հատուկ խնամք պահանջող երեխա ունեցող, 60 և ավելի տարիքի, ինչպես նաև առողջական խնդիրներով՝ շաքարային դիաբետ, սրտանոթային, շնչառական հիվանդություններով աշխատակիցներին:
Հանրապետության տարածքում նոր կորոնավիրուսի տարածման կանխարգելման և համաճարակային վիճակի կայուն պահպանման նպատակով պետական նախարարը կոչ է արել դադարեցնել բազմամարդ հավաքները, սպորտային պարապմունքները և մշակութային միջոցառումները, անորոշ ժամանակով հետաձգել տոնական միջոցառումները, իսկ սգո արարողությունները կազմակերպել ոչ մարդաշատ:
Առողջապահության նախարարի տեղեկացմամբ, ավելի վաղ իրականացված համալիր միջոցառումների շրջանակներում՝ բոլոր բժշկական հիմնարկները համալրվել են անհրաժեշտ բժշկական պարագաներով և նյութերով: Հանրապետության բոլոր շրջաններում և մայրաքաղաքում կահավորված են համապատասխան մեկուսարանները:
Կրթության, գիտության և սպորտի նախարարի հավաստմամբ, կրթական բոլոր հիմնարկների աշխատանքը կասեցված է մեկ շաբաթով, կապված համաճարակային իրավիճակի հետ՝ այն կերկարաձգվի անհրաժեշտության դեպքում: Քննարկումներ են իրականացվում կրթական և ոլորտային գործունեության շարունակականությունն ապահովելու ուղղությամբ:
Արցախի Հանրապետության պետական նախարար, նոր կորոնավիրուսի տարածման կանխարգելման աշխատանքները համակարգող միջգերատեսչական հանձնաժողովի նախագահ Գրիգորի Մարտիրոսյանը իրականացվող աշխատանքների արդյունավետության հարցում ընդգծել է նաև ԶԼՄ –ների դերը՝ համակողմանի և անաչառ լուսաբանման առումով:
Գ.Մարտիրոսյանը շնորհակալություն է հայտնել նաև բուժանձնակազմին՝ այսօրերին ծանրաբեռնված աշխատանքի և բարձր պատասխանատվության համար:
