13.05.2026 | 23:30
Ադրբեջանը հիշատակվում է Պենտագոնի կողմից հրապարակված չբացահայտված թռչող օբյեկտների ֆայլերում
Դա անարգանք է Կարեն Դեմիրճյանի ու Վազգեն Սարգսյանի հասցեին
Քաղաքականություն
27.10.2017 | 11:59
Քանի դեռ Սերժ Սարգսյանը Հայաստանում ունի համապատասխան լծակներ, Հոկտեմբերի 27-ի բացահայտման հարցը պատշաճ քննության չի արժանանալու: Այս մասին այսօր Ազգային ժողովի բակում լրագրողների հետ զրույցում անդրադառնալով Հոկտեմբերի 27-ի ոճրագործության բացահայտմանը՝ ասաց Նիկոլ Փաշինյանը:
Հոկտեմբերի 27-ի ոճրագործությունն, ըստ Փաշինյանի, ունեցել է կազմակերպիչներ, ինչը պաշտոնական վարկած է, քանի որ այդ մասով քրեական գործից անջատված մաս կա:
Ընդդիմադիր քաղաքական գործիչն ասում է՝ այդ վարկածը պատշաճ կերպով չի ուսումնասիրվում և քննության առարկա չի դառնում։
Լրագրողի հարցին, թե համակարծի՞ք է Արա Բաբլոյանի դիրքորոշման հետ, որ Հոկտեմբերի 27-ը Հայաստանի զարգացման և առաջընթացի վրա լուրջ ազդեցություն չի ունեցել, Փաշինյանը դա համարեց ծիծաղելի միտք:
«Դա ուղղակի վիրավորանք է, անարգանք է Հոկտեմբերի 27-ի զոհերի, մասնավորապես՝ Կարեն Դեմիրճյանի և Վազգեն Սարգսյանի հասցեին։ Ես ուզում եմ արձանագրել մի բան՝ Հոկտեմբերի 27-ին գլխատվել է այն Ազգային ժողովը, այն կառավարությունը, որը ձևավորվել է մի ընտրություններով, որի արդյունքները չեն վիճարկվել ընդհանրապես որևէ մեկի կողմից: Որևէ մեկը կասկած չի ունեցել, որ ժողովրդի քվեի արդյունքում ստացված, ձևավորված Ազգային ժողով է ու կառավարություն։ Դրան նախորդած ու հաջորդած բոլոր ընտրությունները լեգիտիմության կասկածելիության բեռն ունեցել են և կարծում եմ՝ նման միտք արտահայտելը պատշաճ չէ որևէ մեկի կողմից: Երկրի զարգացման ամենակարևոր բաղադրիչը մարդկանց համախմբելու կարողություն ունեցող իշխանությունն է: Հայ ժողովուրդը համախմբված էր «Միասնություն դաշինքի» շուրջ»,- հավելեց Փաշինյանը:
Մանրամասները՝ տեսանյութում:
