Կենդանաբանական այգին՝ տուբերկուլյոզի օջա՞խ․ ՍԱՏՄ-ում իրարամերժ կարծիքներ են

Փետրվարի 5-ին Երևանի կենդանաբանական այգում ուղտ էր անկել։ Ուղտից վերցված նմուշներում հայտնաբերվել էին տուբերկուլյոզի հարուցիչներին բնորոշ մանրէներ:

Դեպքի առնչությամբ Factor.am-ին ահազանգել է ՍԱՏՄ վարչության պետ Արմեն Վարդանյանը։

Նրա պնդմամբ՝ Կենդանաբանական այգին տուբերկուլյոզի օջախ է և որպես անասնահամաճարակային նշանակության օբյեկտ, բարձր ռիսկեր և վտանգներ  ունի, ինչպես նաև  տուբերկուլյոզի նկատմամբ վաղուց ստացիոնար /կայուն/ անապահով է։

Մեզ հետ զրույցում Արմեն Վարդանյանը նշեց, որ թեմայի շուրջ մեկնաբանություն կտա կենդանաբանական այգու տնօրինության և ՍԱՏՄ-ի պարզաբանումները լսելուց հետո միայն։

Factor.am-ը կապ հաստատեց ՍԱՏՄ տեղեկատվության և հասարակայնության հետ կապերի բաժնի պետ Անուշ Հարությունյանի հետ, որը մեզ փոխանցեց․ «Վրդովված ենք, որ մեր աշխատակիցները գնացել են այգի և այդքան աշխատանք տարել, իսկ պարոն Վարդանյանը, արձակուրդի մեջ գտնվելով, նման հաղորդագրություն է տարածել։ Առանց ղեկավարության հետ համաձայնեցնելու,  Արմեն Վարդանյանը հաղորդագրություն գրելու իրավունք չունի։ Մենք առաջին օրվանից հետևում ենք ամբողջ գործընթացին։ Կենդանաբանական այգում այս պահին որևէ խնդիր չկա, որովհետև ուղտի անկումից հետո  նրա հետ նույն տարածքում գտնվող ուղտը և ևս 5 կենդանատեսակ, որոնք, հնարավոր է, վարակվեին, ստուգվել են, թեստավորվել տուբերկուլյոզի նկատմամբ։ Մի քանի օր տեղի է ունեցել այգու ամբողջ տարածքի, մարդկանց, սարքավորումների ու շորերի ախտահանում»։

Սննդի անվտանգության տեսչական մարմնի վարչության պետ Արմեն Վարդանյանը, սակայն, պնդում է․ կասկածներ ունի, որ ՍԱՏՄ-ն Կենդանաբանական այգում որևէ գործողություն չի իրականացրել։ «Ես լուրջ մտահոգություններ ունեմ։ Եթե կատարված աշխատանքը բավարար և պատշաճ ներկայացված լիներ, ես մտահոգություններ չէի ունենա։ Խնդիրը նախկինում ֆիքսվել է, հիմա նորից շարունակվում է»,- ասաց Վարդանյանը։

Սրան ի պատասխան՝ ՍԱՏՄ տեղեկատվության և հասարակայնության հետ կապերի բաժնի պետը Factor.am-ին տրամադրեց լուսանկարներ, որոնք ապացուցում են ՍԱՏՄ աշխատակիցների կողմից Կենդանաբանական այգում կատարված աշխատանքները։

Թեմայի շուրջ պարզաբանում ստանալու նպատակով Factor.am-ը կապ հաստատեց նաև Կենդանաբանական այգու մամուլի պատասխանատու Աննա Վանյանի հետ։ Նրա տեղեկացմամբ՝ Սննդամթերքի անվտանգության տեսչական մարմնի և «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» ՊՈԱԿ-ի մասնագետների վերաhսկողությամբ անցկացված կլինիկական զննման արդյունքում՝ անկած, կերից հրաժարվող կամ հիվանդ կենդանիներ չեն հայտնաբերվել:

Կենդանաբանական այգուց Factor.am-ին փոխանցեցին նաև, որ «Թոքաբանության ազգային կենտրոն» ՊՈԱԿ-ի կողմից կենդանաբանական այգու կենդանիներին խնամող անձնակազմի շրջանում անցկացվել են համապատասխան հետազոտություններ և որևէ աշխատակցի մոտ թոքերի տուբերկուլյոզի դեպք չի հայտնաբերվել:

Նելլի Մելքոնյան