Մինսկի խումբը պետք է հստակ ասի՝ այս պահվածքն աննորմալ է. Արմեն Ռուստամյանը՝ սահմանային լարվածության մասին

Ադրբեջանը ղարաբաղյան հակամարտության կարգավորումը բանակցությունների միջոցով չի պատկերացնում: Այս մասին այսօր խորհրդարանում լրագրողների հետ զրույցում հայտարարեց ԱԺ ՀՅԴ խմբակցության ղեկավար Արմեն Ռուստամյանը՝ անդրադառնալով ժնևյան հանդիպումից հետո սահմանային լարվածությանը:

«Ակնհայտ է՝ ինչ խոսվել է բանակցությունների ժամանակ Ադրբեջանի սրտով չի: Ալիևը միայն մի ձևով է պատկերացնում հարցի լուծումը՝ առանց զիջումների հարցը պետք է կարգավորվի, իսկ հանդիպումների ժամանակ բախվում է պատին և վերադառնում է ելակետին՝ հարցը լուծել ուժային տարբերակով»,- Factor.am-ի հարցին ի պատասխան ասաց Ռուստամյանը:

Լրագրողների հարցին՝ ինչո՞վ էր պայմանավորված Սերժ Սարգսյանի լավատեսությունը հանդիպումից հետո, Ռուստամյանն այսպես հիմնավորեց. «Հանդիպման ժամանակ Ալիևի պահվածքը բոլորովին այլ է եղել: Մինչև հիմա էլ փորձը դա է ցույց տալիս՝ հանդիպումներին Ադրբեջանն այլ պահվածք է ցուցաբերում, հանդիպումից հետո՝ այլ»:

Ինչ վերաբերում է ԵԱՀԿ Մինսկի խմբի համանախագահների արձագանքին, ապա ՀՅԴ խմբակցության ղեկավարը նշեց՝ ստեղծված իրավիճակում համանախագահները պետք է ասեն՝ այս պահվածքն աննորմալ է:

Factor.am-ի հարցին՝ արդյոք այս ամենի պատճառը նաև այն չէ, որ Հայաստանը ետ նահանջեց Վիեննայի և Սանկտ Պետերբուրգի համաձայնությունները կյանքի կոչելու պահանջից, Ռուստամյանը հակադարձեց. «Հայաստանը որևէ պայմանավորվածությունից ետ չի նահանջել, էդ տեսակետն ունեն Մամեդյարովն ու Ալիևը, բացի իրենցից էդպիսի տեսակետ որևէ մեկը չի արտահայտել»:

Մանրամասները՝ տեսանյութում:

Շողիկ Գալստյան