02.10.2026 | 23:52
Եղիշե Մելիքյանը՝ Կիպրոսի հավաքականից կրած պարտության մասին. ՏԵՍԱՆՅՈՒԹ
ՄԻՊ-ի ներկայացուցիչները հերթական անգամ առանձնազրույց են ունեցել հացադուլ հայտարարած կալանավորված Վահե Մելոյանի հետ
Հասարակություն
26.12.2019 | 20:48
Քրեակատարողական հիմնարկում երկարատև հացադուլի մեջ գտնվող Վահե Մելոյանի իրավունքների ապահովման հարցը շարունակում է մնալ Մարդու իրավունքների պաշտպանի ուշադրության կենտրոնում. գրում է
Սեպտեմբերի 2-ից հացադուլ հայտարարելուց հետո Պաշտպանի հանձնարարությամբ՝ Վահե Մելոյանի հետ առանձնազրույց ունենալու և նրա առողջական վիճակն ուսումնասիրելու համար մի քանի այց է իրականացվել համապատասխանաբար «Արմավիր» և «Դատապարտյալների հիվանդանոց» քրեակատարողական հիմնարկներ:
«Արմավիր» քրեակատարողական հիմնարկում առանձնազրույցի ընթացքում Վահե Մելոյանը հայտնել է, որ իր հացադուլը պայմանավորված է նրանով, որ ներկայում Արարատի և Վայոց ձորի մարզերի ընդհանուր իրավասության դատարանում քննվող քրեական գործի շրջանակում իրեն առաջադրվել է անհիմն մեղադրանք:
Նրան պարզաբանվել է, որ օրենսդրական արգելքի ուժով Պաշտպանը չի կարող միջամտել վարույթին, պարզաբանվել են նաև Պաշտպանի մյուս լիազորությունները։
Վահե Մելոյանը բարձրացրել է պահման պայմանների հետ կապված որոշակի հարցեր: Դրանց, ինչպես նաև երկարատև հացադուլով պայմանավորված նրա առողջական վիճակի առնչությամբ համապատասխան պարզաբանումների պահանջով գրություն է ուղարկվել Արդարադատության նախարարություն:
Պարզաբանումների համաձայն՝ պահման պայմանների հետ կապված հարցերը լուծվել են, ինչպես նաև Վահե Մելոյանը տվել է ստացիոնար բուժզննություն անցնելու և «Դատապարտյալների հիվանդանոց» քրեակատարողական հիմնարկում հետազոտվելու համաձայնություն:
Մարդու իրավունքների պաշտպանի ներկայացուցիչներն այցեր են իրականացրել նաև «Դատապարտյալների հիվանդանոց» քրեակատարողական հիմնարկ:
Դեկտեմբերի 6-ի այցի ընթացքում Վահե Մելոյանը եղել է անկողնային վիճակում, սակայն գիտակցությունը եղել է պարզ, հարցերին պատասխանել է հստակ: Նշել է, որ իրեն ֆիզիկապես թույլ է զգում, սակայն չի պատրաստվում դադարեցնել հացադուլը:
Դեկտեմբերի 26-ի այցի պահին Վահե Մելոյանը նույնպես եղել է անկողնային վիճակում, գիտակցությունը պարզ է եղել (գիտակցության մթագնում չի արձանագրվել), հարցերին պատասխանել է հստակ: Գանգատվել է ընդհանուր թուլությունից, որովայնի շրջանում սուր ցավերից: Ուսումնասիրվել է նրա բժշկական փաստաթղթերը, նրա առողջական վիճակը քննարկվել է բուժող բժշկի հետ:
Պարզվել է նաև, որ գանգատներով պայմանավորված՝ կազմակերպվել են լաբորատոր-գործիքային հետազոտություններ, գտնվում է բժշկական անձնակազմի հսկողության ներքո, ինչը հաստատել է նաև Վահե Մելոյանը: Վերջին այցի արդյունքները կամփոփվեն, և Մարդու իրավունքների պաշտպանի աշխատակազմը լրացուցիչ գրություն կհասցեագրի Արդարադատության նախարարություն:
Նշենք, որ չհայտարարված այցերի ժամանակ Մարդու իրավունքների պաշտպանի ներկայացուցիչներն ազատությունից զրկման վայրում հացադուլ իրականացնող անձանց մշտապես տեղեկացնում են հացադուլի բացասական հետևանքների մասին, սակայն պետք է նկատի ունենալ, որ հացադուլը կալանավորված անձի կամ դատապարտյալի իրավունքն է, և որևէ մեկն իրավունք չունի հարկադրելու կամ ստիպելու դադարեցնել հացադուլը։
Ընդ որում, ըստ գործող օրենսդրության՝ հացադուլը գիտակցված շարունակող անձի բժշկական զննությունը և հարկադիր կերակրումն արգելվում է:
