Զորակոչային բաժնի աշխատակցի դեմքն այլանդակած զորակոչիկին Քննչական կոմիտեն կալանավորելու միջնորդություն է ներկայացրել, Դատախազությունը՝ «կասեցրել»

Այս տարվա նոյեմբերի 21-ին Կոտայքի մարզի զինկոմիսարիատում զինակոչիկը ածելիով վնասել է զորակոչային բաժնի աշխատակցի դեմքն ու փախել։ Զինկոմիսարիատի աշխատակիցը տեղափոխվել է Աբովյան բժշկական կենտրոն, մեր տեղեկություններով աշխատակցի դեմքն ամբողջովին այլանդակվել է։

Ըստ շրջանառվող որոշ լուրերի՝ զինկոմիսարիատի բակում վիճաբանություն է եղել, որի ընթացքում էլ տեղի է ունեցել միջադեպը։ Ավելի ուշ զինակոչիկը ինքնակամ ներկայացել է Ոստիկանություն և խոստովանական ցուցմունք տվել։

Factor.am-ը Քննչական կոմիտեից փորձեց ճշտել, թե ինչ փուլում է գործը և արդյոք զինակոչիկը կալանավորվել է, թե՝ ոչ։ Factor.am-ի հարցին թե ինչ խափանման միջոց է ընտրվել զինակոչիկի նկատմամբ՝ Քննչական կոմիտեի խոսնակ Նաիրա Հարությունյանը պատասխանեց, որ քրեական գործի նախաքննության ընթացքում Վ.Բ.-ին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով՝ դիտավորությամբ մեկ ուրիշին մարմնական վնասվածք պատճառելու համար, որն արտահայտվել է դեմքի անջնջելի այլանդակմամբ:

«Քննիչի կողմից որոշում է կայացվել Վ.Բ.-ի նկատմամբ կալանավորումը որպես խափանման միջոց ընտրելու միջնորդություն ներկայացնել Երևան քաղաքի ընդհանուր իրավասության դատարան: Նույն օրը,քրեական գործի նկատմամբ դատավարական ղեկավարում իրականացնող դատախազի կողմից միջնորդություն է ներկայացվել Երևան քաղաքի ընդհանուր իրավասության դատարան՝ Վ.Բ.-ի նկատմամբ կալանավորումը որպես խափանման միջոց ընտրելու քննիչի միջնորդությունը առանց քննարկման թողնելու համար: Քրեական գործով նախաքննությունը շարունակվում է»,- ասաց նա:

Լիլիթ Շաբոյան