ԵՐԵՎԱՆԻ ԺԱՄԱՆԱԿՈՎ. «Ռուբեն Վարդանյանը, որն անընդհատ խոսում է պատմության, մշակույթի մասին, ոչնչացնում է հայոց պատմությունը» .Անահիտ Թարխանյան

«Վերջերս հանդիպել եմ Քաղաքաշինության պետական կոմիտեի նախագահ Նարեկ Սարգսյանի հետ, և ուրախությամբ կարող եմ ասել, որ իշխանություններն ուզում են վերականգնել Երիտասարդական պալատը, տեսնում են դրա հնարավորությունները, դրա համար բոլոր պայմանները կան»,- Factor.am-ի «Երևանի ժամանակով» զրուցաշարի շրջանակում հայտնեց ճարտարապետ Անահիտ Թարխանյանը։

Ինչ վերաբերում է «Զվարթնոց» օդանավակայանի հին մասնաշենքի վիճակին, մեր զրուցակցի դիրքորոշումը կտրուկ է․ «20 տարի անց կփոխվի իշխանությունը, կվերականգնենք, կարդիականացնենք «Զվարթնոցը»։ Դրա հնարավորությունները կան, ես դրա համար մի քանի նախագիծ եմ ներկայացրել»։

Ճարտարապետը խոսում է նաև Վազգեն Սարգսյան, Իտալիայի, Խորենացի և Դեղատան փողոցների հատման մասում վեր խոյացած գործարար Ռուբեն Վարդանյանի բիզնես կենտրոնի մասին․ «Փաստացի ոչնչացվեցին Երևանի կենտրոնում գտնվող երեք պատմական շենքեր։ Եթե դա աներ ցանկացած այլ մարդ, ես ցավոտ չէի տանի, բայց Ռուբեն Վարդանյանը, որն անընդհատ խոսում է պատմության, մշակույթի մասին, ոչնչացնում է հայոց պատմությունը։ Դա մի սոսկալի, խայտառակ շենք է, մի հրեշ, որը բարձրացավ քաղաքի կենտրոնում»։

Անահիտ Թարխանյանը, անդրադառնալով օլիգարխների կողմից քաղաքի կենտրոնում կառուցվող «պալատներին», կոչ է անում դադարեցնել այդ գործընթացը․ «Բոլոր աննորմալ գներ ունեցող պալատները կորցնելու են իրենց արժեքը, թոռները կոպեկներով վաճառելու են դրանք։ Գնացեք արվարձաններ և այնտեղ վիլլաներ կառուցեք»,- ասում է նա։

Ճարտարապետը, խոսում է կենտրոնի գերբնակեցված լինելու մասին, նա նկատում է, որ Երևանում ոչնչացվել են օղակաձև այգիները, դադարեցվել է մայրաքաղաքի կենտրոնի ոռոգումը։ Նրա խոսքով՝ այս ամենի համար պատասխանատու է քաղաքապետարանը․ «Եթե շարունակվի իշխանությունների բարբարոս վերաբերմունքը պատմության նկատմամբ, ես չգիտեմ՝ ինչպիսին կլինի ապագայի Երևանը»։ 

Մանրամասները՝ տեսանյութում։

Աննա Բաբաջանյան