Երեխաների ապօրինի որդեգրման դեպքերը հատ-հատ պետք է քննել և բոլոր մետաստազներով բացահայտել․ Նիկոլ Փաշինյան. ՏԵՍԱՆՅՈՒԹ

Մինչ Կառավարության նիստի մեկնարկը վարչապետ Նիկոլ Փաշինյանն անդրադարձավ երեխաների ապօրինի որդեգրման դեպքին։ Նա նկատեց, որ երեկ, ըստ էության, շոկային լուր ստացվեց։

«Ճիշտն ասած՝ օգոստոսի 16-ին, հաշվի առնելով նամակները, ահազանգերը, Կառավարությունում խորհրդակցություն անցկացրեցինք և տրվեցին կոնկրետ հանձնարարականներ ԱԱԾ-ին, Ոստիկանությանը, անկեղծ ասած, մարդկայնորեն չէի կարող հավատալ, որ կլինեն բացահայտումներ։ Փաստը մնում է փաստ, որ ունենք ձերբակալված անձինք»,- ասաց Փաշինյանը։

Ապա նա, դիմելով Քննչական կոմիտեի նախագահ Հայկ Գրիգորյանին, հետաքրքրվեց․ «Պարոն Գրիգորյան, ի՞նչ կարող եք ասել, այդ կասկածները դառնալո՞ւ են մեղադրանք առաջադրելու որոշում և ի՞նչ տեղեկություն կարող եք հայտնել գործի մասին»։

Քննչական կոմիտեի նախագահ Հայկ Գրիգորյանը տեղեկացրեց, որ 2 շաբաթ առաջ այս գործով ձերբակալվել էր ևս մեկ անձ, որին այս պահին մեղադրանք է առաջադրված, երեկ ձերբակալվել են ևս 4 անձինք։ «Ապացույցների համակցությունն այս պահին բավարար է նրանց մեղադրանք առաջադրելու Քրեական օրենսգրքի 167 հոդվածի 2-րդ մասով՝ ծնողներից երեխաներին ապօրինի բաժանելը։ Գործով կատարվել են մի շարք խուզարկություններ, ԱԱԾ-ի, Ոստիկանության, Դատախազության գործընկերների հետ համատեղ այդ գործով զբաղվում ենք։ 2012 թվականից առ այսօր բոլոր փաստաթղթերն առգրավվել են։ Կատարվելու է քննություն, ունենք մի շարք անձանց ուղղակի ցուցմունքներ, որոնք մերկացնում են այդ անձանց այդ հանցանքը կատարելու մեջ։ Մոտ օրերս այդ անձանց նշված հոդվածով կառաջադրվեն մեղադրանքներ, կընտրվեն խափանման միջոցներ»,- տեղեկացրեց Գրիգորյանը։

Նրա խոսքին արձագանքեց վարչապետը և նշեց․ «Շատ լավ, պարոն Գրիգորյան, հասկանալի է, որ այդ գործը բավականին էմոցիոնալ արձագանք է առաջացրել հանրության մեջ, բայց կարևոր է, որ գործի քննությունը լինի առաց էմոցիաների։ Պետք է հասկանալ, թե ինչպես է պատահել և ինչպես է պատահում, որ ՀՀ-ում կարող է նման մեխանիզմ գոյություն ունենալ և գործել։ Պետք է խնդիր դնենք գործի ամբողջական քննություն իրականացնելու համար, որպեսզի այս գործն իր բոլոր մետաստազներով բացահայտվի։ Բոլոր այս կարգի դեպքերը պետք է հատ-հատ քննել, ուսումնասիրել, որպեսզի հնարավոր բոլոր կասկածները փարատվեն, ու մենք համոզվենք, որ ՀՀ-ում այդ ամոթալի էջը փակել ենք իր բոլոր հնարավոր իրավական հետևանքներով»։

Մանրամասները՝ տեսանյութում։