Հասարակություն
16.12.2019 | 18:04Վերաքննիչ քրեական դատարանում շարունակվում է Ռոբերտ Քոչարյանի պաշտպանների բողոքի քննությունը։
Նիստի մեկնարկին Քոչարյանի պաշտպան Արամ Վարդևանյանը դատավոր Լուսինե Աբգարյանին ինքնաբացարկի միջնորդություն ներկայացրեց։ Արամ Վարդևանյանն իր խոսքում նշեց, որ դատավորի եղբայրը՝ Դավիթ Աբգարյանը, ֆեյսբուքյան իր էջում կիսվել է Սերժ Թանկյանի գրառմամբ, որտեղ նշված է, թե նա ուրախ է, որ Ռոբերտ Քոչարյանը կրկին բանտում է․ «Ֆեյսբուք սոցիալական ցանցի ուսումնասիրությունից պարզ է դառնում, որ Ձեր եղբայրը մտերիմ հարաբերություններ է ունեցել սույն գործով տուժողների նախկին ներկայացուցիչ Վահե Գրիգորյանի հետ»։
Բացի այդ, Արամ Վարդևանյանն ասաց, որ ըստ court.am կայքի, դատավորը վաղվանից պետք է լինի արձակուրդում և հարց է ծագում, թե ինչպես է գործը նրան մակագրվել։
Դատախազ Գևորգ Բաղդասարյանն առարկեց ներկայացված միջնորդության դեմ՝ ասելով, որ չի կարողանում հասկանալ, թե դա ինչ կապ ունի դատավորի հետ․ «Ես կարծում եմ, որ բոլորի եղբայրներն ու քույրերը իրավունք ունեն կարծիք հայտնելու, տխրելու և ուրախանալու, ինչպես նաև ինչ-որ կապեր ունենալու»։
Դատախազն ասաց, որ նույնիսկ եթե դատավորի եղբայրը տարածել է նման նյութ, դա դեռ չի նշանակում, որ Լուսինե Աբգարյանը կանխակալ է:
«Իմ լսած փաստարկները ինձ հիմք չեն տալիս Ձեզ կասկածելու կողմնակալության մեջ»,- ասաց դատախազը։
Մյուս մեղադրող Պետրոս Պետրոսյանը ևս միացավ առարկությանը՝ ասելով, որ ներկայացված փաստարկները հիմնավոր չեն, և դատարանը պետք է մերժի միջնորդությունը։
Մանրամասները՝ տեսանյութում։
Լիլիթ Շաբոյան
