«Տեղեկատվության ազատության մասին օրենքում ոլորտային հարցերի կարգավորում մի՛ մտցրեք». Շուշան Դոյդոյան. ՏԵՍԱՆՅՈՒԹ

«Տեղեկատվության ազատության մասին» օրենքի մեջ փոփոխություն մտցնելով, շատ հնարավոր է, որ օգուտ տալու փոխարեն, մեծ վնաս հասցնեք։ Օրենքը չի կարող ենթարկվել ոլորտային փոփոխության։ Եթե վաղը Առողջապահության նախարարությունը գտնի, որ իրենց ոլորտում մի խումբ տվյալներ շատ կարևոր է հանրությունից գաղտնի պահել՝ նոր հիմքեր կավելացնեն, մյուս օրը Էկոնոմիկայի նախարարությունը, էն մյուս օրը՝ Պաշտպանության նախարարությունը։ Այսպես, սկսում են այս օրենքը բզկտել»,- այս մասին այսօր՝ «Տեղեկատվության ազատության մասին» օրենքի փոփոխություն՝ առանց տեղեկատվության ազատության. քաղհասարակությունը մտահոգ է» թեմայով քննարկման ընթացքում նշեց Ինֆորմացիայի ազատության կենտրոնի նախագահ Շուշան Դոյդոյանը։

«Խնդիրը և մեր ընդդիմության մեխը համարվում է այն, որ չի կարելի և պետք է բացառել այս հույժ կարևոր օրենքը՝ հակակոռուպցիոն հզոր գործիքը, մասնատել և հատվածային, ոլորտային բարեփոխումների ենթարկել։ Օրենքը 16 տարուց ավելի է՝ ունի դրական, նույնիսկ՝ արտահանման ենթակա փորձ։ Այս օրենքին այսպես հպանցիկ, կտցելու ձևով ձեռք տալը ուղղակի վնասում է ամբողջ կառուցվածքին, տրամաբանությանը և ազդեցությանը։ Եթե ձեր ոլորտում փոփոխություն անելու անհրաժեշտություն ունեք, գնացեք ձեր ոլորտի օրենսդրությունն ինչքան ուզում եք փոփոխեք»,- ասաց Շուշան Դոյդոյանը։

Նշենք, որ ՀՀ Շրջակա միջավայրի նախարարությունը դեկտեմբերի 2-ին շրջանառության մեջ է դրել «Տեղեկատվության ազատության մասին» ՀՀ օրենքում լրացումներ կատարելու մասին օրենքի նախագիծը՝ առաջարկելով օրենքում սահմանել «բնապահպանական տեղեկատվություն» եզրույթը և բնապահպանական տեղեկության տրամադրման մերժման հիմքերը: Մասնավորապես, առաջարկվում է օրենքի 8-րդ հոդվածը լրացնել հետևյալ բովանդակությամբ. «Տեղեկատվություն տնօրինողը կարող է մերժել բնապահպանական տեղեկության տրամադրումը, եթե այն վերաբերում է բուսական և կենդանական աշխարհի հազվագյուտ տեսակների բազմացման վայրերին»։

Մանրամասները՝ տեսանյութում։

Նելլի Մելքոնյան