Խուսափած զորակոչի դիմաց այլևս հնարավոր չի լինի գումար վճարել և ազատվել քրեական պատասխանատվությունից․ վարաչպետ. ՏԵՍԱՆՅՈՒԹ

Կառավարության նիստի ժամանակ Պաշտպանության նախարար Դավիթ Տոնոյանը նշեց, որ Ազգային ժողովի պատգամավորների օրենսդրական նախաձեռնության շրջանակներում քննարկման ներկայացված օրենքի նախագծի համաձայն՝ առաջարկվում է երկարաձգել սահմանված կարգի խախտմամբ զինվորական ծառայության չանցած և 27 կամ պահեստազորի կամ սպայական կազմի համար 35 տարին լրացած քաղաքացիների նկատմամբ օրենքի գործունեությունը տարածելու ժամկետը՝ մինչև 2019 թվականի դեկտեմբերի 31-ը, ինչպես նաև ուժը կորցրած ճանաչել օրենքի գործունեությունը դադարեցնելու վերաբերյալ դրույթը, որի համաձայն՝ օրենքի ուժը կորցրած պետք է ճանաչվի 2020 թվականի հունվարի 1-ից։

Պաշտպանության նախարար Դավիթ Տոնոյանը տեղեկացրեց, որ նախագծի ներկայացումը հիմնավորվում է նրանով, որ այն հնարավորություն կտա 27 տարին լրացած, պարտադիր զինվորական ծառայությունից խուսափած քաղաքացիներին սահմանված ժամկետում մուծել օրենքով սահմանված դրույքաչափերին համապատասխան վճարը և վերադառնալով հայրենիք, ազատվել քրեական հետապնդումից:

«Նպատակահարմար չէ խրախուսական համարվող oրենքի գործողության ժամկետի հետագա երկարաձգումը այն նույն պայմաններով, որոնք այս պահին գործում են»,- նշեց Տոնոյանը։

Վարչապետն էլ նշեց, որ ըստ էության՝ ասում են, որ օրենքը, որն այն մասին էր, որ քաղաքացիները ներկայանում էին և ամեն խուսափած զորակոչի դիմաց գումար էին վճարում, ազատվում էին քրեական պատասխանատվությունից, այդ օրենքի երկարացում այլևս չի լինի։

«Բայց այդ օրենքն ուժի մեջ կմնա մինչև այս տարվա դեկտեմբերի 31-ը։ Քաղաքացիները կարող են տոմս առնել, գալ Հայաաստան, այս բոլոր պրոցեդուրաներն անցել, Նոր տարին էլ նշել Հայաստանում»,- նշեց Փաշինյանը։

Նախագիծը դրվեց քվերակության և ընդունվեց։