Պարզվեց, որ քաղաքապետարանը չունի նվերներ ընդունելու կարգ. Լենա Նազարյան. ՏԵՍԱՆՅՈՒԹ

Ինձ համար շատ ցավալի է, երբ կոռուպցիոն մեղադրանքներ են ներկայացվում պաշտոնյաների, որոնք մեր կուսակցության անդամներ են։ Այդ մարդիկ անմտորեն խաղ են անում իրենց ճակատագրի հետ։ Այս մասին այսօր՝ «Կոռուպցիայի դեմ պայքարը՝ հանուն կայուն զարգացման նպատակների» թեմայով փորձագիտական քննարկման ընթացքում նշեց Ազգայի ժողովի փոխնախագահ Լենա Նազարյանը։

«Այսօր Հայաստանում կոռուպցիան չունի քաղաքական հովանավորություն։ Սա զուտ քաղաքական հայտարարություն չէ։ Մեր կուսակցության մեջ կոռուպցիայի մերժումը և նման երևույթների հանդեպ անհանդուրժողականությունն անբեկանելի համոզմունք է և այդ ճանապարհին ոչ ոք ներում չի ստանալու՝ ով ուզում է լինի։ Մեր ընկալմամբ կոռուպցիան ոչ միայն օրինախախտում և հանցանք է, այլ նաև անձնական վիրավորանք»,- ասաց Լենա Նազարյանը։

Անդրադառնալով Երևանի քաղաքապետարանի ընդունած նվիրատվությունների շուրջ ստեղծված աղմուկին, ԱԺ փոխնախագահն ասաց․ «Երբ քաղաքապետարանը մասնավորից նվերներ ընդունեց, առաջին բանը, որ արեցի, փոխքաղաքապետին զանգելն էր՝ ճշտելու համար, թե արդյոք քաղաքապետարանն ունի նվերներ ընդունելու կարգ։ Պարզվեց՝ ոչ, չունի։ Կարծում եմ՝ նաև դա է պատճառը, որ այսպիսի աղմուկ է բարձրացել։ Ես բացառում էի որևէ կոռուցպիոն գործարքի հնարավորություն, բայց այն, որ չկար հրապարակային և վերահսկելի ընթացակարգ, դա արդեն խնդիր էր։ Այս դեպքից հետո ես դիմեցի ավագանու «Իմ քայլ»-ի գործընկերներին՝ խնդրելով, որ անպայման մշակեն նման կարգ, որպեսզի հետագայում նման հարցեր չառաջանան»։

Մանրամասները՝ տեսանյութում։

Նարեկ Կիրակոսյան