Դատական քննությանը կերևա ինչն է ջուր. Երևանի դատախազը՝ Քոչարյանի մեղադրանքի մասին. ՏԵՍԱՆՅՈՒԹ

Երևանի դատախազ Գևորգ Բաղդասարյանից  Factor.am-ը հետաքրքրվեց, թե ինչ դիրքորոշում ունի Քոչարյանի պաշտպանների այն հայտարարության մասին, թե իրենք մեղադրանքը դատարանում «ջախջախելու են», որ այն ջուր է և հիմնազուրկ:

«Կասեմ, որ դա իրականությանը չի համապատասխանում։ Դատական քննության ընթացքում կերևա, թե ինչն է ջուր»,- ասաց նա։

Անդրադառնալով «անցանկալի» դատավորների մասին հայտարարություններին, դատախազը ևս մեկ անգամ կրկնեց, որ իրենց համար ցանկալի դատավորներ չկան, և որ իրենք որևէ դատավորի վարույթից հեռացնելու սկզբունքային մոտեցում չունեն. «Ցանկալի դատավորներ չունենք, յուրաքանչյուր դեպքում գործը դատավորին մակագրվելու դեպքում մենք բոլորի նման, մեր դատավարական լիազորություններն ենք իրականացնում, քննարկում ենք՝ արդյոք հնարավոր համարո՞ւմ ենք դատավորի կողմից տվյալ գործի քննությունը, թե՝ ոչ»։

Ռոբերտ Քոչարյանի պաշտպաններից Ռուբեն Սահակյանի հայտարարության մասին, թե դատավորները խորշում են քննել այս գործը, ևս հարց հնչեց, մասնավորապես լրագրողները դատախազից հետաքրքրվեցին, թե ինքը դատավորների կողմից գործը քննելուց խուսափելու միտում տեսնում է, Բաղդասարյանը պատասխանեց. «Ես չեմ կարող ասել՝ որևէ դատավոր հիմք ունի՞ խուսափելու, թե՞ ոչ։ Կարծում եմ՝ այդ հարցը յուրաքանչյուր դատավոր պետք է ինքն իրեն տա։ Ես մասնակցում եմ սույն գործով որպես մեղադրող և չեմ խուսափում մասնակցելուց։ Ես չեմ կարող ասել՝ որևէ դատավոր կխուսափի, թե՝ ոչ, ես իմ մասով կարող եմ ասել՝ առանց մտավախության պաշտպանում եմ մեղադրանքը»։

Մանրամասները՝ տեսանյութում։

Լիլիթ Շաբոյան