12.08.2026 | 19:06
Զելենսկին շնորհավորել է Փաշինյանին
ՌԴ ՔԿ-ն Խաչատուրյան քույրերի հոգեբուժական փորձաքննությունից մանրամասներ է հայտնել. նախաքննությունն ավարտվել է
Հասարակություն
03.12.2019 | 14:14
Խաչատուրյան քույրերից երկուսը հոր՝ Միխայիլ Խաչատուրյանի սպանության պահին կարող էին գիտակցել իրենց գործողությունների փաստացի բնույթը, երրորդ քրոջը հարկադիր բուժման կուղարկեն: ՌԻԱ Նովոստիի փոխանցմամբ՝ այս մասին հայտնել է ՌԴ Քննչական կոմիտեի պաշտոնական ներկայացուցիչ Սվետլանա Պետրենկոն:
Նա հավելել է, որ քննությունը բավարար ապացուցողական բազա է հավաքել, գործի նախաքննությունն ավարտվել է:
Խաչատուրյան քույրերից երկուսի նկատմամբ հարուցված քրեական գործն ուղարկվել է դատախազին՝ մեղադրական եզրակացությունը հաստատելու: Քույրերից կրտսերի գործը նույնպես դատախազությունում է՝ անհրաժեշտ բուժման մասին որոշմամբ:
Ռուսաստանաբնակ Խաչատուրյանների ընտանիքում աղմկահարույց սպանությունը, հիշեցնենք, տեղի է ունեցել անցյալ տարվա հուլիսին: 57-ամյա Միխայիլ Խաչատուրյանի մարմինը հայտնաբերել են բազմաթիվ կտրած-ծակած վերքերով: Քննության տվյալներով՝ նրան սպանել են երեք դուստրերը:
Աղջիկների պնդմամբ՝ թմրանյութի ազդեցության տակ գտնվող հայրը դանակով հարձակվել է իրենց վրա, իրենք էլ հարկադրված են եղել պաշտպանվել: Քույրերը պնդում են նաև, որ տևական ժամանակ հայրը ծաղրուծանակի է ենթարկել իրենց: Քննչական մարմինները պարզել են, որ աղջիկները չեն ստել հոր վերաբերմունքի մասին, այդ թվում՝ սեռական բնույթի ոտնձգության:
Մարիա, Քրիստինա և Անգելինա Խաչատուրյաններն ամբողջությամբ ընդունել են մեղքը: Այնուամենայնիվ, քույրերին մեղադրանք է առաջադրվել նախնական համաձայնությամբ խմբակային սպանության համար: Նրանք 8-20 տարի ժամկետով ազատազրկում է սպառնում:
Պաշտպանական կողմն իր հերթին պնդում է, որ տեղի ունեցածն անհրաժեշտ ինքնապաշտպանություն է, և հույս ունի, որ գործը կփակվի:
