Մարդու իրավունքների մասին՝ սուրճի հյուրասիրությամբ․ «Երիտասարդ եվրոպական դեսպաններ» նախաձեռնության միջոցառումը. ՏԵՍԱՆՅՈՒԹ

Զրույց մարդու իրավունքների մասին՝ մեկ բաժակ սուրճի շուրջ։ Մարդու իրավունքների միջազգային օրվան ընդառաջ՝ Հայաստանի «Երիտասարդ եվրոպական դեսպաններ» նախաձեռնությունը միջոցառում է կազմակերպել, որը նախորդ տարի Գյումրիում առաջին ներառական փուռ-սրճարանի ակցիայի շարունակությունն է։

«Երիտասարդներին անվճար սուրճ և թեյ ենք առաջարկում` հատուկ QR կոդով և մարդու իրավունքներին մասին գրությամբ բաժակներով։ QR կոդը սկանավորելով՝ կարող են տեսնել Մարդու իրավունքների համընդհանուր հռչակագրի փաստաթուղթը։ Այսինքն՝ անվճար հյուրասիրության միջոցով մարդկանց պատմում ենք իրենց իրավունքների մասին»,- ասում է նախաձեռնության անդամ Արեգ Գալոյանը։

Քոֆի թրաքն իրականություն է դարձել Եվրամիության աջակցությամբ ՝ «iMigrant Armenia» ծրագրի միջոցով: Ծրագրի նպատակն է ՝ օժանդակել աշխատանքային միգրանտներին և նրանց ընտանիքներին՝ օգտագործել իրենց ներուժը սեփական համայնքներում նորարարական բիզնես մոդելներ ստեղծելու համար:

«Ուզում ենք ցույց տալ, որ յուրաքանչյուր ոք, որն ունի ցանկություն, կարող է ստեղծել իր՝ թեկուզ փոքիկ բիզնեսը»,- նշում է «Երիտասարդ եվրոպական դեսպաններ» նախաձեռնության համակարգող Անի Խաչատրյանը։

«Երիտասարդ եվրոպական դեսպաններ» նախաձեռնությունն ուղղված է նպաստելու Եվրոպական միության (ԵՄ) ու Արևելյան գործընկեր երկրների` Հայաստանի, Ադրբեջանի, Բելառուսի, Վրաստանի, Մոլդովայի Հանրապետության և Ուկրաինայի երիտասարդների ու երիտասարդական կազմակերպությունների միջև համագործակցությանը և կայուն կապերին:

Այն խթանում է ԵՄ-ի վերաբերյալ գաղափարների ու տեղեկատվության փոխադարձ փոխանակմանը, ինչպես նաև երիտասարդների ներգրավվածությանը տեղեկատվական գործողություններում:

Մանրամասները՝ տեսանյութում։

Նելլի Մելքոնյան