Վտանգ և «Բաց հասարակության-հիմնադրամներ» հասկացությունները անհամատեղելի են. Լարիսա Մինասյանն արձագանքում է Վանեցյանին. ՏԵՍԱՆՅՈՒԹ

«Վտանգ և «Բաց հասարակության հիմնադրամներ» հասկացությունները մեկտեղել իսկապես անհնար է, որովհետև 22 տարի բաց և թափանցիկ ենք աշխատել, մեր գործունեությունը բոլոր ցանկացողներին հասանելի է եղել։ Մեր գործունեությունն ուղղված է եղել միմիայն հնարավորինս էֆեկտիվ ձևով ՀՀ Սահմանադրությունում արձանագրված իրավունքների ջատագովությանը, պաշտպանությանը, ՀՀ պետական ինստիտուտների ուժեղացմանը, Հայաստանի հասարակության, քաղհասարակության, կրթական, առողջապահական համակարգերի ուժեղացմանը և այս ոլորտներում իրավունքի սատարմանը։ Եթե դա վտա՞նգ է․․․ եթե Հայաստանի Սահմանադրության չափանիշներով չի չափվում վտանգը, ապա ես այդ վտանգներից գաղափար չունեմ։ ՀՀ Սահմանադրության չափանիշով մեր գործունեությունը վտանգ չի եղել և չի կարող լինել։ Եթե պարոն Վանեցյանը ունի ուրիշ չափանիշներ՝ ուրիշ փաստաթղթերով, ես պատասխանատու չեմ դրա համար»,- ասում է «Բաց հասարակության հիմնադրամներ-Հայաստանի» գործադիր տնօրեն Լարիսա Մինասյանը՝ արձագանքելով Արթուր Վանեցյանին։

Ինչո՞ւ է Վանեցյանը նման հայտարարություն արել պաշտոնանկությունից հետո։ Լարիսա Մինասյանը պարզաբանում է՝ նպատակը եղել է, որ վտանգ և «Բաց հասարակության հիմնադրամներ» բառերը արծարծվեն միմյանց կողքին․ «Բացարձակ ոչ մի հնարավորություն չկա իր կողմից որեւէ բան ավելացնելու, բայց ինքն իր վնասն արդեն արել է»։

Անդրադառնալով հիմնադրամի ֆինանսական թափանցիկության մասին  լրագրողի հարցին՝ Լարիսա Մինասյանը շեշտեց, որ ֆինանսական հաշվետվությունը ամեն տարի հաստատվում է աուդիտով․ «Ընդգծեմ, որ աուդիտի մեջ է մտնում նաև գործունեության բարեվարքության, ծրագրերի կատարման, դրամաշնորհների ընտրության, հաստատման բարեվարքությունը։ Այդ մասը, որը չի հրապարակվում, ստուգվում է աուդիտով։ Մեր հրապարակային գործունեությունը հասու է բոլորին՝ լրագրողներին նմանապես, հորդորում եմ ծանոթանալ և խնդրում եմ լուսաբանել։ Իսկ թե ինչպե՞ս, ին՞չ նպատակով և ինչո՞ւ է անում իր հայտարարությունները պարոն Վանեցյանը, ես արդեն ասացի՝ կամ ուրիշ չափանիշով է չափում վտանգը, կամ էլ թյուրիմացության և սադրանքի գործընթացի մեջ է, որը ինձ չի հետաքրքրում։ Որևէ իրավական գործընթաց մեր հիմնադրամի հանդեպ, անգամ՝ անհամապատասխանության որևէ նշում, օրինակ՝ Պետական եկամուտների ծառայությունից, որ այս հարկը այսպես չեք վճարել, ամբողջ 22 տարում այդպիսի բան չի եղել»,- ընդգծեց Լարիսա Մինասյանը։

Մանրամասները՝ տեսանյութում:

Ռոբերտ Անանյան