Հետևելով Հայաստանի ընտրություններին՝ երջանիկ էի տեսնել դրական առաջընթացը․ Անդրեա Վիկտորին

«Ես մի երկրից եմ, որտեղ միշտ ստիպված էի լինում անընդհատ կառավարությանը համոզել, որ քաղհասարակությունը հավելյալ արժեք է և իրոք կարևոր է լսել նրանց։ Եթե ունես իշխանություն, որին ընդդիմանում ես և ասում, որ ինքը ժողովրդավար չէ, իրավունքի գերակայությունը չի պահպանում, քննադատում ես կոռուպցիան, շատ ավելի հեշտ է, քան երբ ունենաս կառավարություն, որը գնում է ճիշտ ուղղությամբ, բայց և միգուցե քաղհասարակության քննադատական ձայնի կարիքը չունի։ Երբ ես անցյալ տարի հետևում էի Հայաստանի ընտրություններին, իրոք, հպարտ էի, երջանիկ էի տեսել, որ այդպիսի դրական ընթացք կա, և քաղհասարակությունը ունեցել է լումա դրանում՝ առաջ քաշելով նախկին համակարգի հետ կապված մտահոգությունները»,- «Դրական փոփոխություն՝ քաղաքացիական հասարակության հզորացման միջոցով» միջոցառման ժամանակ ասաց Հայաստանում Եվրոպական միության դեսպան Անդրեա Վիկտորինը։

Նա ասաց, որ այսօր մեծ աշխատանք է կատարվում դատական համակարգի բարեփոխումների ուղղությամբ․ «Մենք լիովին կողմ ենք խտրականության բացառմանը, խոցելի խմբերի հարգմանը, դա նշանակում է, որ հանդուրժողականությունը տարածվի այն խմբերի վրա, որոնք ձեր նախընտրած ապրելակերպով չեն ապրում։ Դա անելիք է բոլորի համար, և միայն Հայաստանում չէ, որ այդ գործընթացը կա։ Երկու օր առաջ անցկացրեցինք ներառական մոդայի շոուն: Հուզիչ էր տեսնել, որ իսկապես բեմահարթակը տրամադրվեց հաշմանդամություն ունեցող անձանց, որ նրանց նկատմամբ հարգալից վերաբերմունք եղավ, և նրանք ներառված էին, ինչը նրանց հիմնական իրավունքներից է։ Մենք ձգտում ենք ներառական հասարակություն կառուցել»,- ասաց Եվրամիության դեսպանը։

Ռոբերտ Անանյան