Կա մի զանգված, որը նենգափոխելով՝ փորձում է անվստահություն սերմանել հեղափոխության հաջողության հանդեպ․ Լարիսա Մինասյան

«Բաց հասարակության հիմնադրամներ-Հայաստանը» մշտապես ուժեղացնում է քաղաքացիական հասարակությունը, դա մեր առաքելությունն է։ Մինչև հեղափոխությունը մեր գործունեությունը մարդու իրավունքների պաշտպանության բնագավառում սևեռված էր մոնիթորինգին՝ այն նպատակով, որ ժխտողական, մերժողական մոտեցում կար իրավունքի խախտման, արդարադատության անհասանելիության, սոցիալական անհավասարության հարցերի շուրջ, և դրանք վեր հանելը մեծապես դժվար աշխատանք էր և մոնիթորինգը մեծ տեղ էր զբաղեցնում մեր գործունեության մեջ»,- «Դրական փոփոխություն՝ քաղաքացիական հասարակության հզորացման միջոցով» միջոցառման ժամանակ ասաց «Բաց հասարակության հիմնադրամներ-Հայաստան»-ի գործադիր տնօրեն Լարիսա Մինասյանը։

Նրա գնահատմամբ՝ մեկ իրավիճակ է, երբ մտնում ես երկխոսության մեջ՝ պրոբլեմը լուծելու շուրջ մտածելու առաջարկով, մեկ ուրիշ հանգամանք է, երբ ցույց է տրվում պրոբլեմը, բայց երկխոսության մեջ հնարավոր չի լինում մտնել։

«Այդ պարագայում մենք պրոբլեմներ էինք տեսնում, որ գործը ավելի դժվարացնում էր՝ չկար տարբեր հարցերի միատեսակ, նույն ստանդարտներով չափված մոնիթորինգ, և դա դառնում էր մանիպուլյացիայի առիթ։ Այդ գիտելիքն ու բազան մոնիթորինգների, որ չէր դառնում հենման կետ շարունակական աշխատանքի համար, մենք տեսնում էինք մեծ վտանգ»,- ասաց տիկին Մինասյանը։

«Բաց հասարակության հիմնադրամներ-Հայաստան»-ի գործադիր տնօրենի գնահատմամբ՝ իրավիճակը ներկայումս ակնհայտորեն փոխվել է՝ հասարակության և կառավարության հարաբերություններում վստահության աստիճանը անհամեմատ ավելի բարձր է․ «Մենք վերջին մեկ տարում բախվել ենք մի դժվար պրոբլեմի հետ, որ մեծագույն տարածում ունի ոչ փաստացի և փաստի հետո որևէ կապ չունեցող լրատվությունը, և եթե առաջներում մարդու իրավունքների պաշտպանությունը հեգնանքի էր արժանանում որոշ լրատվամիջոցների կողմից, հիմա կա մի զանգված, որը խեղաթյուրում ու նենգափոխում է այս աշխատանքը և լուրջ վտանգ է ներկայացնում այդ վստահության համար, վտանգ՝ հասարակության՝ իր ուժերի մեջ վստահության, կառավարության, հեղափոխության հաջողության վստահության մասով և այդ պատճառով լրագրողների գործը, առաքելությունը կարևոր է դառնում՝ իսկապես ապահովել բազմակարծությունը և ոչ թե բազմաթիվ ոչ փաստերի տարածումը»,- ասաց Լարիսա Մինասյանը։

Մանրամասները՝ տեսանյութում:

Ռոբերտ Անանյան