10.09.2026 | 16:27
Նախկինում դատապարտված և հանցավոր հակումներ ունեցող 77 անձ է ներկայացվել Համայնքային ոստիկանության տարածքային բաժիններ
Եթե Հայաստանը չպահեց հայոց լեզուն, ո՞վ պիտի պահի, ու դա պիտի արվի պետականորեն, հակառակ դեպքում անկախությունն անիմաստ է. Արա Պապյան
Հասարակություն
11.10.2017 | 17:40
Վերջերս Ռուսաստանի կրթության և գիտության նախարար Օլգա Վասիլևնան ասաց, որ երկու օտար լեզվի ուսուցումը շռայլություն է պետության համար. այս մասին այսօր հրավիրված «ՀՀ պետական լեզվաքաղաքականությունը. հայոց լեզվի մարտահրավերները և ռուսաց լեզվի դասավանդման հայեցակարգը» թեմայով ասուլիսին ասաց ՀՀ ԳԱԱ հնագիտության և ազգագրության ինստիտուտի բանահյուսության բաժնի վարիչ Թամար Հայրապետյանը:
«Նա գտնում, է. որ իրենց մոտ՝ Ռուսաստանում, ռուսերեն լեզուն շատ վատ մակարդակի վրա է և իրենց աշակերտները լեզվին լավ չեն տիրապետում: Եթե իրենք գտնում են, որ 2-րդ օտար լեզուն շռայլություն է, մեր պարագայում մեր աշակերտին ավելի շատ օտար լեզու է պարտադրվում: Դրանք նույնպես խնդիրներ են»,- նկատեց Հայրապետյանը:
Ասուլիսին հրավիրված մյուս բանախոս, «Մոդուս վիվենդի» կենտրոնի ղեկավար Արա Պապյանն էլ ասաց, որ սա , ըստ էության պետք է դիտարկել հայոց պետականության և ինքնիշխանության կրճատման ընդհանուր ծիրի մեջ:
«Եվրոպացիները սրան կոչում են սալյամիի քաղաքականություն, հայկական տարբերակով կարող ենք ասել բաստուրմայի քաղաքականություն: Այն է, եթբ շերտ առ շերտ քո ինքնիշխանությունը կտրվում փոքրացվում է: Աննկատ է ամեն անգամ, բայց, ի վերջո, տեսնում ես, որ ոչինչ չմնաց: Իսկապես սա չպիտի արվի մայրենիի հաշվին: Իսկ հաշվի առնելով, որ արդեն բյուջեով նախատեսված է կրթության և գիտության ֆինանսավորման կրճատում և կրճատելու են ամենթույլ օղակներից, ուրեմն դա մայրենի լեզուն է»,- ասաց նա:
Պապյանն ապա անդրադարձավ ԵՏՄ ու ԵՄ աշխատանքային լեզուներին՝ նշելով, որ եթե առաջինում միակ աշխատանքային լեզուն ռուսերենն է, ապա ԵՄ-ում առնվազն տասը աշխատանքային լեզու կա, ու բոլոր փաստաթղթերը թարգմանվում են այդ լեզուներով: «ԵՏՄ-ում ինքնին արդեն դրդելու են, պարտադրելու են ռուսերենի իմացությունը»,- ասաց նա ընդգծելով, որ որոշ ժամանակ անց Հայաստանում լավ աշխատանքի համար ռուսերենի իմացությունը պարտադիր է լինելու:
«Եթե Հայաստանը չպահեց հայոց լեզուն, ո՞վ պիտի դա անի: Ու դա պիտի արվի պետականորեն , հակառակ դեպքում անկախությունն անիմաստ է»,- ասաց բանախոսը:
Մանրամասները՝ տեսանյութում:
