12.08.2026 | 21:19
Երկու բրոնզե մեդալ՝ արհեստական բանականության միջազգային օլիմպիադայում
Ներառական մանկապարտեզում երեխային աթոռին կապելը իրավունքի բացահայտ ոտնահարում է․ Լյուդմիլա Սարգսյան. ՏԵՍԱՆՅՈՒԹ
Հասարակություն
26.11.2019 | 18:18
Ներառական կրթությամբ թիվ 92 մանկապարտեզում անհասկանալի մեթոդաբանություն է կիրառվում, հոգեկան խնդիրներ ունեցող երեխաներին կապում են աթոռներից և զրկում տեղաշարժվելու հնարավորությունից, ընդ որում՝ երեխաները հենաշարժողական խնդիրներ չունեն։ Երևանի ավագանու այսօրվա նիստում այս մասին ասաց ԲՀԿ խմբակցության անդամ Լյուդմիլա Սարգսյանը։
«Իրավիճակի մասին բարձրաձայնած մասնագետի նկատմամբ հալածանքներ սկսվեցին: Քաղաքապետարանում քննարկվել է և լոյալ վերաբերմունք է ձևավորվել այդ մանկապարտեզի նկատմամբ։ Երեխաներին աթոռներին կապելը նրանց իրավունքի բացահայտ ոտնահարում է։ Ուսուցիչն իր աշխատանքային ժամերը հանգիստ անցկացնելու համար հորինել է մեթոդաբանություն և կարողանում է կիրառել, ծնողներին ահաբեկել են»,- հայտարարեց Սարգսյանը։
Ի պատասխան՝ Երևանի քաղաքապետի տեղակալ Տիգրան Վիրաբյանն ասաց. «Այս խնդիրներին պետք է մաքուր ձեռքերով մոտենալ։ Որոշ կայքեր կարող են այս խնդիրներին մոտենալ այնպես, որ իրենց դիտողականությունը բարձրացնեն։ Այդ մեթոդն ընդունելի է, թե՝ ոչ, ես չեմ կարող դրա պատասխանը տալ»:
Փոխքաղաքապետն ասաց, որ մի շարք մասնագետների են հրավիրել քննարկման, արդյունքում անհրաժեշտություն է առաջացել խոսակցությունը նեղ մասնագիտական դաշտ տանելու։
«Կան մարդիկ, որ ասում են՝ մեթոդաբանությունը ճիշտ է, բայց պարագաները ժամանակակից չեն, և դրանք են ստեղծում տպավորություն, թե մեթոդաբանությունը ճիշտ չէ։ Ունեցել եմ ծանր խոսակցություն ծնողների հետ։ Նման հարցերը մենք պետք է թողնենք մասնագետների տիրույթում և պատասխաններ ակնկալենք միայն նրանցից»,- հավելեց նա:
Մանրամասները՝ տեսանյութում:
Ռոբերտ Անանյան
