Հասարակություն
11.10.2017 | 15:01«Մենք կողմ ենք տարկետման իրավունքի վերացմանը, կամ ավելի ճիշտ` ստույգ դարձնելուն»,- այսօր Աժ-ում «Զինապարտության և զինվորական ծառայության մասին օրենսդրական նոր կարգավորումների վերաբերյալ» թեմայով խորհրդարանական լսումների ընթացքում հայտարարեց ԵՊՀ ռեկտոր, ռեկտորների խորհրդի նախագահ Արամ Սիմոնյանը:
Նա, սակայն, անդրադառնալով բակալավրիատի ուսանողների` առաջին կիսամյակը չավարտած` բանակ զորակոչվելու հարցին, նշեց. «Մեր բոլորի` բուհերի խնդրանքն է եղել, որպեսզի հնարավորություն տրվի առաջին կուրսեցի ուսանողներին ավարտելու առաջին կիսամյակը և նոր զորակոչվելու: Դա կապված է ժամանակի խնայողության հետ: Բակալավրիատը չորս տարի է, դրանից հետո երկու տարի երիտասարդը ծառայում է բանակում, հետո վերադառնում` երկու տարի շարունակում է ուսումը մագիստրատուրայում: Դրանից հետո էլ` երեք տարի գնում է ասպիրանտուրա, և արդեն 30 տարեկան դարձած` նոր միայն նա կարող է որպես գիտությունների թեկնածու մուտք գործել գիտություն: Սա բավականին մեծ տարիք է արդեն, և երիտասարդ գիտնական հասկացությունը, կարծես թե, մեջտեղից արդեն դուրս է գալիս»,- ընդգծեց Սիմոնյանը:
