«Եթե Իրանում դրությունը վատացավ, Հայաստանը շատ կտուժի»․ Արման Նավասարդյան. ՏԵՍԱՆՅՈՒԹ

Կցանկանայի, որ հայ լրագրողների այցն Ադրբեջան բանակցային գործընթացում փոփոխություն բերեր։ Երևույթը լավն է՝ որպես փափուկ ուժի միջոցառում, բայց անձամբ ես հույսեր չեմ կապում, քանի որ Ադրբեջանի կողմից այնքան մեծ ու ընդգծված հակահայկական քայլեր կան։ Նրանք հակահայկական քաղաքականություն են վարում, դա 1915-ի քաղաքականության շարունակությունն է։ Այս մասին այսօր Factor.am-ի հետ զրույցում նշեց ՀՀ ԱԳ նախկին փոխնախարար, արտակարգ և լիազոր դեսպան Արման Նավասարդյանը։

«Եթե դա նույնիսկ կօգնի, որ ավելի քիչ կրակեն, ավելի քիչ արյուն թափվի, արդեն լավ է, բայց մեծ հաշվով, չէի համարձակվի ասել, որ հարց կլուծի»,- ասաց Նավասարդյանը։

Անդրադառնալով Իրանում՝ նախորդ շաբաթ ստեղծված լարված իրավիճակին, Արման Նավասարդյանը նշեց․ «Եթե շարունակվի, մեզ վրա շատ բացասական ազդեցություն կունենա։ Երկկողմ հարաբերություններից, բարեկամական կապերից բացի, սա այն երկիրն է, որը մեզ կապում է արտաքին աշխարհի հետ՝ չհաշված Վրաստանը։ Եթե հանկարծ դրությունն ավելի վատացավ, Հայաստանը դրանից շատ կտուժի։ Իսկ եթե պատերազմական գործողություններ եղան, Հայաստանի համար դա աղետին հավասար մի բան կլինի։ Եթե երկրում փլուզում լինի, և երկիրը մասնատվի, Ադրբեջանն ավելի կտուժի, քանի որ այնտեղ 20 մլն ադրբեջանցի կա։ Իրանի կայունությունը կարևոր է տարածաշրջանի համար, բայց, կարծես թե, ներքին լարվածությունն աստիճանաբար սկսում է նվազել։ Թե ինչ ընթացք կստանա, կտեսնենք։ Կարևորն այն է, որ վառելիքի հետ կապված այդ ներքին լարվածությունը, որը տնտեսական ճգնաժամ է, հանկարծ չդառնա քաղաքական լայն շարժում, որին նաև մասնակցեն դրսի ուժերը, իսկ այդպիսիք կան»։

Մանրամասները՝ տեսանյութում։

Նելլի Մելքոնյան