Մուշեղ Սաղաթելյանն արդարացվեց․ դատախազը հրաժարվեց մեղադրանքից

Երևանի ընդհանուր իրավասության դատարանը Մեսրոպ Մակյանի նախագահությամբ կայացած այսօրվա դատական նիստում որոշեց արդարացնել Մարտի 1-ի գործով դատապարտված Մուշեղ Սաղաթելյանին։

Սաղաթելյանը առողջական վիճակով պայմանավորված ներկա չէր դատական նիստին։ Կալանավայրերի վարչության նախկին պետ Մուշեղ Սաղաթելյանը, հիշեցնենք, ձերբակալվել էր 2008-ի մարտի 1-ին: Նույն տարվա հոկտեմբերին դատապարտվել էր 5 տարվա ազատազրկման և 900 հազար դրամ տուգանքի` մեղավոր ճանաչվելով սառը զենք կրելու և իշխանության ներկայացուցչի նկատմամբ վտանգավոր բռնություն կիրառելու համար:

Այսօրվա դատական նիստում մեղադրող դատախազը հանդես եկավ հայտարարությամբ․ «Հրաժարվում եմ Մուշեղ Սաղաթելյանի նկատմամբ քրեական հետապնդում իրականացնելու պահանջից»։

Այս հայտարարությանը փաստաբան, Մուշեղ Սաղաթելյանի ներկայացուցիչ Սեդա Սաֆարյանն արձագանքեց․ «Բան չունենք ասելու, ՄԻԵԴ-ի որոշումից հետո սա տրամաբանական էր»։

Դատավոր Մեսրոպ Մակյանը կողմին լսելուց հետո հեռացավ վճիռ կայացնելու․ «Մուշեղ Սաղաթելյանին ՀՀ քրեական օրենսգրքի 316-րդ հոդվածի 1-ին և 2-րդ մասերով և 235-րդ հոդվածի 4-րդ մասով առաջադրված մեղադրանքներում արդարացնել, ճանաչելով և հռչակելով նրա անմեղությունը նշված հոդվածներով նախատեսված արարքների մեջ»։

Հիշեցնենք, որ հունիսի վերջին ՀՀ վճռաբեկ դատարանն ամբողջությամբ բավարարել էր 2008թ. մարտիմեկյան իրադարձություններին մասնակցած Մուշեղ Սաղաթելյանի վերաբերյալ Երևանի քրեական դատարանի և ՀՀ վերաքննիչ քրեական դատարանի 2008-2009 թթ. կայացրած դատական ակտերը նոր հանգամանքներով վերանայելու ՀՀ գլխավոր դատախազի բողոքը։ Եվրոպական դատարանը, ըստ Գլխավոր դատախազության, «Սաղաթելյանն ընդդեմ Հայաստանի» գործով արձանագրել է Մարդու իրավունքների եվրոպական կոնվենցիայի մի քանի հոդվածների՝ մասնավորապես, խոշտանգումների արգելման, ազատության և անձնական անձեռնմխելիության, արդար դատաքննության, հավաքների ազատության իրավունքների խախտումներ։

Լիլիթ Շաբոյան