12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Լինդսի Գրեմը Հայոց ցեղասպանությունը ճանաչող բանաձևի տապալման մեղքը բարդել է Սպիտակ տան վրա
Քաղաքականություն
25.11.2019 | 12:34
Հանրապետական սենատոր Լինդսի Գրեմը Հայոց ցեղասպանությունը ճանաչող բանաձևի ընդունումը Սենատում արգելափակել է Դոնալդ Թրամփի վարչակազմի խնդրանքով: Այս մասին գրում է ՌԻԱ Նովոստին՝ վկայակոչելով Axios-ը:
Կայքի տեղեկություններով՝ երբ Գրեմը հեռացել է Թուրքիայի նախագահ Էրդողանի հետ հանդիպումից, Սպիտակ տան բարձրաստիճան պաշտոնյաներից մեկը մոտեցել է նրան և տեղեկացրել, որ դեմոկրատ սենատոր Ռոբերտ Մենենդեսը պատրաստվում է քվեարկության դնել Հայոց ցեղասպանությանը վերաբերող բանաձև ու հարցրել՝ «կարո՞ղ է արգելափակել այն»:
«Ես ասացի՝ իհարկե… Միակ պատճառը, որ ես արեցի դա, այն է, որ նա (Էրդողանը) դեռ քաղաքում էր: Դրա համար անհարմար ժամանակ էր: Ես փորձում եմ փրկել երկու երկրների հարաբերությունները, եթե դա հնարավոր է»,- ասել է Գրեմը:
Նա, միաժամանակ, ասել է, որ հաջորդ անգամ դեմ չի արտահայտվի բանաձևին:
Իսկ «հաջորդ անգամը», ըստ Axios-ի, տեղի է ունեցել անցյալ շաբաթ, երբ Մենենդեսն ու նրա գործընկեր Թեդ Քրուզը կրկին Հայոց ցեղասպանության ճանաչման բանաձև են ներկայացրել: Այս անգամ էլ այն արգելափակելու խնդրանքով Սպիտակ տունը դիմել է այլ սենատորի՝ Դևիդ Պերդյուին:
Հիշեցնենք, որ հոկտեմբերի 29-ին ԱՄՆ Կոնգրեսի Ներկայացուցիչների պալատը Հայոց ցեղասպանությունը ճանաչող բանաձև ընդունեց: Նմանատիպ բանաձև Սենատում ներկայացրեց նաև դեմոկրատ Ռոբերտ Մենենդեսը:
