Վանեցյանը թող ցուցմունք տա, ասի՝ ուզում էի դա անել, վարչապետը թույլ չտվեց. Էդմոն Մարուքյան. ՏԵՍԱՆՅՈՒԹ

Պարոն Վանեցյանը երկար տարիներ աշխատել է ԱԱԾ-ում, «Բաց հասարակության հիմնադրամները» ՀՀ-ում գործում է երկար տարիներ, այն ժամանակներից, երբ պարոն Վանեցյանը եղել է Էրեբունի համայնքում ԱԱԾ պետ, Կենտրոն համայնքում պետի տեղակալ, հետո՝ ԱԱԾ տնօրեն: Եթե նման մտահոգություններ կային, պետք է որոշակի գործողություն աներ, քրգործեր պետք է հարուցվեին: Այս մասին լրագրողների հետ զրույցում ասաց ԼՀԿ խմբակցության ղեկավար Էդմոն Մարուքյանը՝ անդրադառնալով ԱԱԾ նախկին տնօրեն Արթուր Վանեցյանի այն հայտարարությանը, որ «Սորոսի» հիմնադրամը Հայաստանի համար վտանգներ է պարունակում:

«Հետևաբար, այդ հայտարարությունները ես գնահատում եմ տոտալ քաղաքական, հնարավոր է՝ ինտրիգ և ապագայում խոսելու վերաբերյալ սպասելիք ձևավորելու առումով: Ասում է՝ ժամանակը կգա, կխոսեմ, որ դուք սպասեք, թե նա երբ է խոսելու»,- ասաց նա:

Մարուքյանը մտահոգություն հայտնեց, որ «Հայաստանը հիմա մի երկիր է, որտեղ երեք առանցքային պաշտոններում չկան նշանակված ղեկավարներ՝ չկա ՊՎԾ պետ, ԱԱԾ պետ և ոստիկանապետ. «Ընդ որում, ՀՀ պատմության մեջ չի եղել, որ այսքան երկար ժամանակ չլինեն այդ նշանակումները»:

Ճեպազրույցների ժամանակ նաև հետաքրքրվեցինք՝ արդյո՞ք իրենց կուսակցությունները դրսից ֆինանսավորվել են: «Իմ քայլը» խմբակցության ղեկավար Լիլիթ Մակունցը վստահեցրեց՝ ՔՊ-ն որևէ երկրից գումար չի ստանում. «ՔՊ-ի գումարները ձևավորվում են անդամավճարների տեսքով, երբ մենք հանրային դրամահավաքներ ենք կազմակերպում»:

ԲՀԿ պատգամավոր Վահե Էնֆիաջյանն էլ ասաց, որ ԲՀԿ-ն ինքնաբավ քաղաքական ուժ է, և նման հարցադրումները իրենց ուժի հետ չեն կարող առնչվել:

Էդմոն Մարուքյանի պատասխանը հետևյալն էր. «Ձեր նշած հարցերի վերաբերյալ՝ ժամանակը կգա, և ես կխոսեմ», այնուհետև հավելեց. «Դրսից ֆինանսավորում չունենք, անգամ ես կարող եմ ասել՝ ներսից ֆինանսավորում չունենք: Հայաստանի պատմության մեջ միակ խորհրդարանական ուժն է «Լուսավոր Հայաստանը», որ մեդիա չունի, չի եղել նման քաղաքական միավոր, որ գոնե մի հատ թերթ չունենա»:

Հարցին՝ եթե ներսից չի և դրսից չի, ինչպե՞ս են գործունեություն ծավալում, Մարուքյանը պատասխանեց՝ «Ձեր աջակցությամբ»:

Ըստ Մարուքյանի՝ Արթուր Վանեցյանը հանցագործությունների մասին հաղորդում է ներկայացրել Քրեական օրենսգրքի մի շարք հոդվածներով, և դրանք պետք է պատշաճ քննարկման առարկա դառնան. «Երբ քննարկվեն, կտեսնենք»:

Դիտարկմանը՝ գուցե Վանեցյանը ցանկացել է իր հայտարարությունների հետքերով գնալ, բայց թույլ չեն տվել դա անել, դրա համար էլ հրաժարական է տվել, Մարուքյանն արձագանքեց. «Դե թող ցուցմունք տա, ասի՝ ուզել էի դա անել, վարչապետը ինձ թույլ չտվեց»:

Մանրամասները՝ տեսանյութում:

Նարեկ Կիրակոսյան