Հասարակություն
25.11.2019 | 13:42Սկսում ենք նախաձեռնություն, որի նպատակը մի շարք կարևոր խնդիրների բարձրաձայնումն է և եղած կասկածների բացահայտման փորձը։ Այս մասին այսօր լրագրողների հետ զրույցում նշեց «Ռեստարտ» ուսանողական նախաձեռնության անդամ Դավիթ Պետրոսյանը։
«Մենք շարունակում ենք ունենալ ուժային կառույցներ, որոնցից ժողովրդի վախը շատ է։ Սա ինչքանո՞վ է տրամաբանական։ Արդյոք քաղաքացիները պետք է վախենան ԱԱԾ-ից, Ոստիկանությունից, Դատախազությունից և դատարաններից՝ այն պարագայում, երբ ցանկանում են, որ իրենց իրավունքներն այս կառույցների կողմից պաշտպանված լինեն»,- ասաց Պետրոսյանը։
Ըստ նրա՝ հեղափոխությունից հետո Հայաստանում շարունակում են խոսակցություններն այն մասին, թե քաղաքացիների հեռախոսները գաղտնալսվում են։
«Այսօր բոլորի մոտ կա մտավախություն․ սկսած քաղաքացիներից, վերջացրած՝ պետական պաշտոնյաներով, թե մեր հեռախոսները գաղտնալսվում են։ Ի՞նչ իրավունքով, ի՞նչ նպատակով ինչ-որ մեկը կարող է լսել իմ հեռախոսը։ Եթե ԱԱԾ-ն չի կարողանում իրականացնել իր ազգի պաշտպանությունը, ուրեմն ԱԱԾ-ն անգործություն է իրականացնում։ Եվ սա միայն ԱԱԾ-ին չի վերաբերում։ Եթե պետական ինստիտուտները չեն իրականացնում իրենց պարտավորությունը՝ պաշտպանել սեփական քաղաքացիների անվտանգությունը, ապա իրենց անգործությամբ մասնակից են դառնում այն հանցագործություններին, որոնք տեղի են ունենում։ Մինչև հիմա ժողովրդի մոտ չկա վստահության մթնոլորտ, իսկ եթե այդպես է, ուրեմն Հայաստանում հեղափոխությունն ավարտված չէ»,- նշեց Պետրոսյանը։
Մանրամասները՝ տեսանյութում։
Նելլի Մելքոնյան
