Իրավական հարթության մեջ չեմ պատկերացնում Մանվել Գրիգորյանի և Նազիկ Ամիրյանի գործերի հնարավոր առանձնացումը․ Լևոն Բաղդասարյան

Այսօր իրավապաշտպանները որոշ հնչեղ գործերով, այդ թվում՝ Մանվել Գրիգորյանի գործով, իրենց հիմնական գործը թողած, պայքարում են տոտալ անարդարության դեմ, որի կրողը դատական իշխանությունն է, և որի կրողը, ինչու չէ, նաև երկրի բարձրագույն իշխանությունն է։ Ավելին՝ վերջին շրջանում փորձեք տեսնել, թե միջազգային որոշ կառույցներ ինչ են խոսում մեր դատական համակարգի մասին։ Լրագրողների հետ զրույցում իր մտահոգությունները բարձրաձայնեց Մանվել Գրիգորյանի պաշտպան Լևոն Բաղդասարյանը։

«Խոսում են հետևյալը, որ վայ դատական համակարգը Հայաստանում ծաղկում է ապրում։ Հոգնել ենք արդեն բարձրաձայնելուց, որ տոտալ խոշտանգումներ են գնում։ Դուք նախորդ դատական նիստին ականատես եղաք՝ նման դաժան վերաբերմունք ՀՀ-ում՝ հիվանդ անձին անկողնուց հանել բերելը, ընդամենը 2 րոպե էլ չկարողացավ դիմանալ, բժիշկները բարձրաձայնեցին, որ ըստ էության՝ այնպիսի վատթարացում էր գնում, որ անգամ արհեստական շնչառությունը չէր բավարարում, ներարկում արեցին և նրան անմիջապես տեղափոխեցին հիվանդանոց։ Սա՞ ենք մենք ուզում ՀՀ-ում, իհարկե՝ ոչ»,- ասաց փաստաբանը։

Հարցին՝ արդյոք առանձնացվելո՞ւ են Նազմիկ Ամիրյանի և Մանվել Գրիգորյանի գործերը և քննվելու են առանձին, Լևոն Բաղդասարյանը պատասխանեց․ «Նախ՝ ես չգիտեմ իրավական հարթության մեջ դա ինչպես են պատկերացնում։ Նախորդ դատական նիստին նախագահող դատավորն ուղղակի հայտարարեց, քանի որ հիվանդություններն այնպիսին են, որ Գրիգորյանը չի կարող մասնակցել դատական նիստին, միգուցե, առանձնացնի։ Հարգելի՛ նախագահող, բա որ դու առանձնացնում ես, մինչև հիմա միջնորդություն ենք ներկայացնում, ասում ենք, որ հիվանդություններն այնպիսին են, որ չի կարող գալ դատական նիստին, նաև կալանքը խանգարում է, կալանքը փոխեք, ո՞րն է պատճառը․․․արդյոք դա՞ է արդարադատությունը՝ առանձնացնել և մեկ ժամ շուտ ցուցանիշ ապահովել ու դատական ակտ հրապարակել»։

Իսկ թե հաջորդ նիստին Մանվել Գրիգորյանը ներկա կլինի, թե՝ ոչ, փաստաբանը դժվարացավ պատասխանել։