Քաղաքականություն
19.11.2019 | 18:14Նախ, անհրաժեշտ է հասկանալ՝ ինչ է կատարվում։ Սա, կարծեմ, երեք տարվա ընթացքում արդեն երրորդ դեպքն է, որ հուզումներ են տեղի ունենում մեր հարևան կարևոր երկրում՝ Իրանում։ Իհարկե, տնտեսական խնդիրներ կան, դժգոհություն կա։ Բայց ես չէի տարանջատի տնտեսությունը քաղաքականությունից, մասնավորապես՝ արտաքին քաղաքականությունից։ Այս մասին այսօր` «Իրավիճակն Իրանում սրվում է. ապակայունացման տնտեսական ու աշխարհաքաղաքական հետևանքները» թեմայով հրավիրված քննարկման ընթացքում նշեց ՀՀ ԱԳ նախկին փոխնախարար, արտակարգ և լիազոր դեսպան Արման Նավասարդյանը:
«Այն, ինչ կատարվում է ամերիկյան քաղաքականությունում՝ Իրանի նկատմամբ, սա դրա արտահայտություններցի մեկն է և, անպայմանորեն, պետք է իր շարունակությունն ունենա։ Այնտեղ շատ լուրջ խնդիրներ կան՝ կապված միջուկային զենքի հետ, ԱՄՆ պատժամիջոցների, Իրանի չենթարկվելու։ Այնուամենայնիվ, մասնագետների կարծիքով՝ սա չի հասցնի իշխանափոխության։ Այդպիսի վտանգ, կարծես թե, չկա։ Իրանն այն երկիրն է, որ ճնշման տակ ավելի է ամրանում, միավորվում։ Նրան հեշտությամբ չեն կարող հունից հանել»,- ասաց Արման Նավասարդյանը։
Ըստ նրա՝ այն, ինչ հիմա կատարվում է Իրանում շղթայի մի օղակն է, որ ամբողջ տարածաշրջանմում է սկսել և գնում է քաղաքական լանդշաֆտի փոփոխության. «Սիրիա, հետո Իրաք, Լիբանան, հիմա՝ Իրանի հերթն է, նրա կողքին մեր անմիջական հարևան Վրաստանում են ինչ-որ բաներ սկսել։ Այսինքն՝ Մերձավոր Արևելքում տեղի է ունենում շատ լուրջ, բեկումնային, աշխարհաքաղաքական փոփոխություն»։
Մանրամասները՝ տեսանյութում։
Նելլի Մելքոնյան
