«Մեր խորհրդարանը շատ ուժեղ, ռուսական խորհրդարան է». Անուշ Սեդրակյան

Քաղաքագետ Անուշ Սեդրակյանը Factor.am-ի հետ զրույցում պետականության ու պետության պաշտպանության համար «կործանիչ» է համարում Հայ-ռուսական զորախումբ ստեղծելու և Ռուսաստանի հետ զենքի վաճառի նոր պայմաններ սահմանելու մասին համաձայնագրերի վավերացումը:

«Մեր խորհրդարանը շատ ուժեղ, ռուսական խորհրդարան է: Նույնիսկ չեմ ասում՝ պրոռուսական, ասում եմ ռուսական»,- ասաց քաղաքագետը՝ շարունակելով. «Դիմադրություն ցուցաբերում է էն միավորը, որն ուզում է դիմադրություն ցուցաբերել: Մեր խորհրդարանը որոշել է լռելյայն համաձայնության գալ իշխանության հետ՝ մանդատ-հնազանդություն բարտերով»:

Ըստ նրա՝ եթե Հայաստանի բնակչության 50 տոկոսը գտնվում է կանխակալ կարծիքի ազդեցության ներքո, որ ռուսներն ինչ էլ անեն, մեզ օգուտ է ու մեր վտանգը Թուրքիան է, ցանկացած մանիպուլյացիա կարող են անել:

«Պետություն են մեռցնում, հետո դիմացինին ասում են՝ դու պրոֆեսիոնալ չես, ի՞նչ ես հասկանում, բայց պետական ներկա ցուցանիշները մահացող մարդու ցուցանիշներ են»,-տեսակետ հայտնեց քաղաքագետը՝ հարց բարձրացնելով, թե ո՞վ է պատասխան տալու ոչ միայն պետության գաղափարի կործանման, այլև նրա համար, որ «առանց մի կաթիլ արյան անկախություն ստանալուց հետո մենք այդ անկախությունը վաճառել ենք քանի այն գին ուներ, հիմա արդեն չենք էլ վաճառում, փորձում ենք տեսնել՝ ով է մուշտարի, որ փոխանակենք, սեփական օգուտների համար փոխս տանք էդ անկախությունը»,- ասաց նա:

Անուշ Սեդրակյանի խոսքերով՝ Հայաստանում քաղաքական գործունեության համար ֆինանսական ռեսուրսներ կարող են ունենալ միայն այն ուժերը, որոնք ունեն իշխանության դաբրոն: «Հայաստանում քաղաքական գործունեության համար դրսից ռեսուրս բերելու բոլոր փորձերը դատապարտված են: Հարցրեք Ալիկ Արզումանյանին»,- շեշտեց նա:

Ինչ վերաբերում է Հիմնադիր խորհրդարանի անդամ Ժիրայր Սեֆիլյանի կոչին՝ որով նա անվանական ցուցակ հրապարակելով, կոչ է արել ազգային դիմադրության ճակատ ստեղծել, Անուշ Սեդրակյանի խոսքերով՝ Սեֆիլյանի ցուցակի կեսը պրոռուսական գործիչներ են:

«Եթե ընդդիմությունը իր միակ առաքելությունը տեսնում է ժողովրդի միտինգային գործունեության մեջ, էդ ընդդիմությունը պետք է հեռանա: Ընդդիմությունը պրոռուսական դաշտից մի քայլ չի հեռանում, իսկ Սեֆիլյանի ցուցակի ուղիղ կեսը ռուսական էմիսարային գոտուց են»,- ասաց քաղաքագետը` հավելելով, որ Ժիրայր Սեֆիլյանը պատերազմի հերոս ու գիտակ է, սակայն դա չի նշանակում, որ նա նաև քաղաքականության գիտակ է:

Անուշ Սեդրակյանը նաև խորապես կասկածում է, որ նոյեմբերին Հայաստան-ԵՄ համաձայնագիրը կստորագրվի. «Ամեն ինչը բերում է դրան, որ այս անգամ էլ կտապալվի»:

Մանրամասները դիտեք քաղաքագետ Անուշ Սեդրակյանի հետ Factor.am-ի հարցազրույցում:

Մարինե Խառատյան