15.07.2026 | 00:59
ԱԱ-2026․ Իսպանիան հաղթեց Ֆրանսիային և դուրս եկավ եզրափակիչ․ ՏԵՍԱՆՅՈՒԹ
Կառավարության կադրային բանկի միջոցով 1 տարվա ընթացքում աշխատանքի է անցել 5 հոգի, որից 2-ն ազատվել է
Հասարակություն
18.11.2019 | 22:44
Մեկ տարի առաջ՝ 2018 թվականի նոյեմբերի 19-ին, Ֆեյսբուք սոցիալական ցանցի միջոցով ՀՀ վարչապետ Նիկոլ Փաշինյանը տեղեկացրեց, որ ստեղծվում է կադրային բանկ: Նպատակն այն էր, որ տարբեր ոլորտի որակյալ մասնագետներ հնարավորություն ունենան իրենց որակական հատկանիշների մասին տեղեկացնել գործադիր մարմնին, իսկ պահանջներին բավարարելու դեպքում էլ աշխատանքի անցնեն որևէ գերատեսչությունում:
Այս ընթացքում կառավարությունը ստացել է մոտ 2500 ինքնակենսագրական (CV)։ Այս մասին Factor.am-ի գրավոր հարցմանն ի պատասխան տեղեկացրել են վարչապետի աշխատակազմից: Կադրային բանկի ստեղծումից մեկ տարի անց, սակայն, պետական կառույցներում աշխատանքի է անցել ընդամենը հինգ քաղաքացի, որից երկուսն արդեն ազատվել է:
Կադրային բանկի միջոցով Հակոբ Ճաղարյանը 2019 թվականի մարտի 19-ին նշանակվել է ՀՀ վարչապետի խորհրդական, Արթուր Գրիգորյանը՝ 2019թ. մարտի 28-ին փոխվարչապետ Տիգրան Ավինյանի օգնական, իսկ Սուրեն Ղամբարյանը, որն, ի դեպ, մինչ այդ զբաղեցում էր Սոցիալական ապահովության ծառայության պետի պաշտոնը, 2019 թվականի սեպտեմբերի 23-ին նշանակվել է վարչապետի օգնական:
Կառավարության կադրային բանկի միջոցով աշխատանքի անցած ևս երկու պաշտոնյա էլ կարճ ժամանակահատված աշխատելուց հետո ազատվել է: Մասնավորապես, Մհեր Սահակյանն ընդամենը չորս ամիս վարչապետի օգնական աշխատեց և Նիկոլ Փաշինյանի որոշմամբ ազատվեց աշխատանքից: Արդարադատության նախարարի նախկին տեղակալ Տիգրան Խաչիկյանը, որը կրկին նույն տարբերակով էր աշխատանքի անցել, պաշտոնավարեց երեք ամիս: Նա փոխնախարար էր նշանակվել ապրիլի 10-ին, աշխատանքից ազատվելու դիմում ներկայացրել հուլիսի 17-ին: Ստացվում է, որ մեկ տարի անց կառավարությունում ստեղծված կարդային բանկի միջոցով պետական համակարգում աշխատում է երեք հոգի:
Կառավարությունից Factor.am-ին փոխանցված պատասխանում նշվում է, որ ստացված 2500 ինքնակենսագրական տվյալներից (CV) աշխատանքային խումն ուսումնասիրել է 1500-ը, որից 90-ը ներառվել է կադրային բանկում: Կառավարությունից չեն բացառում, որ առաջիկայում կադրային բանկից կլինեն նոր նշանակումներ:
Կառավարության կողմից փոխանցված պաշտոնական տվյալներից կարելի է եզրակացնել, որ քաղաքացիները ոգևորված չեն կադրային բանկին դիմելու հարցում։ Մասնավորապես, 2018 թվականի նոյեմբերից մինչ հունվար կառավարություն CV է ուղարկել 2100 քաղաքացի: Այս մասին տեղեկանում ենք գործադիր մարմնի ֆեյսբուքյան էջից: 2019 թվականի փետրվարին կառավարությունից Factor.am-ին փոխանցել էին, որ քաղաքացիների թիվը հասել է
2350-ի: Իսկ արդեն մարտ-նոյեմբեր ժամանակահատվածում՝ ինը ամիսների ընթացքում, նրանց թիվն ավելացել է ընդամենը 150-ով:
Նարեկ Կիրակոսյան
