Մակրոնը պատասխանել է, որ ինքն անձամբ շատ մոտիկից հետևում է Քոչարյանի դատավարությանը․ փաստաբան

«Մեկ անձի կամքով է իրականացվում Ռոբերտ Քոչարյանի դատավարությունը։ Նա քաղաքական անձնավորություն է, դատավոր չէ։ Նա վարչապետն է։ Նրա կամքից է կախված բոլոր այս դատավարությունները»,- Այսօր լրագրողների հետ հանդիպմանը հայտարարեց Հայաստանի երկրորդ նախագահ Ռոբերտ Քոչարյանի ֆրանսիացի փաստաբան Սևակ Թորոսյանը։

Փաստաբանի խոսքով, բոլոր այն դատավորները, որոնք կփորձեն անկախ քննություն իրականացնել ՀՀ երկրորդ նախագահ Ռոբերտ Քոչարյանի գործով ու կկայացնեն այնպիսի որոշում, որը չի համապատասխանի վարչապետի ցանկությանը, իրենց մտքում գիտեն, որ իրենց հետ երեք բան է լինելու՝ խուզարկություն, քրեական գործի հարուցում և հեռացում:

«Ես դատավոր լինեի, հենց այսպես կմտածեի։ Հիմա Հայաստանում դատավորներն աղոթում են, որ նման մեծ գործերով չզբաղվեն։ Փոքր գործերով ազատություն կա, լավ բաներ լսել եմ, բայց նման նուրբ խնդիրները, երբ վարչապետի երևակայած թշնամուն է խոսքը վերաբերում, աղոթում են, որ նման գործերով չզբաղվեն։ Մեծ քաջություն է պետք, որ դատավորն ասի՝ չէ, կալանավորումն արդար չէ»,- ասաց Թորոսյանը։

Փաստաբանը նաև տեղեկացրեց, որ ինքը Ֆրանսիայի նախագահ Էմանուել Մակրոնին նամակ է գրել: «Ես նրան ասացի, որ Նիկոլ Փաշինյանն ուղղակի ձևերով հրահանգում է։ Եթե Մակրոնը պատասխանել է, որ ոչ թե Ֆրանսիան, այլ ինքն անձամբ շատ մոտիկից հետևում է նախագահ Քոչարյանի դատավարությանը, ինձ ասաց, որ տեղյակ է։ Նախ, պետք է դատավորների գլխավոր մարմինը հստակ ձևով հայտարարություն անի, որ դատավորներն անկախ են և քաղաքական որևէ մարմնից հրահանգ ստանալու կարիք չունեն»,- նշեց Թրոսյանը։

Լիլիթ Շաբոյան